Sámediggeráđi mielas lea buorre go lea álggahuvvon evalueren ja áigu buktit árvalusaid evaluerenraportii.  
 
- Guolástus- ja riddodepartemeanta lea álggahan guovllubivdoeriid evaluerema Guolástusdutkamis Romssas. Sámediggeráđi mielas lea buorre go lea álggahuvvon evalueren ja áigu buktit árvalusaid evaluerenraportii. Jos dán čielggadusa boađus čájeha ahte guovllubivdoearreortnet ii doaimma, de ferte ortnet heivehuvvot nu ahte mihttomearri ollašuvvá, dadjá ráđđelahttu Ann-Mari Thomassen.

Gulaskuddancealkámušas čakčat lei Sámediggi mielas ortnegii ja čujuhii earret eará ahte fatnasat mat leat vuollel 15 mehtera galget vuoruhuvvot. Sámedikki rolla ii galgga malssiduvvot Finnmárkku fylkkagielddain, mii njuolga hálddaša guovllubivdoearreortnega. Fylkkagielda dat juogada bivdoeari fylkka siskkobealde. Sámediggi áigu bargat viidáseappot oččodan dihte váikkuhanfámu guovllubivdoeriid hálddašeapmái.

Sámediggi bargá aktiivvalaččat guolástuspolitihkain ja lea maŋimuš jagis leamaš mielde konsultašuvnnain Guolástus- ja riddodepartemeanttain go guoská guolástushálddašeapmái. Konsultašuvnnaid oktavuođas departemeanttain lea ságaškuššon eamiálbmotvuoigatvuođaid birra ja daid njuolggadusaid birra. Hui deaŧalaš lea čilgehit riektegažaldaga. Lea váttis fievrridit politihka dán suorggis jos vuoigatvuođat eai leat čilgejuvvon. Ođđajagis áigu Sámediggi konsulteret strukturortnega hárrái. Strukturdieđáhus lea deaŧalaš sámi guolástussii, danne go dat earret eará válddahallá bivdoearrejuohkima.

- Sámediggi áigu searvat aktiivvalaččat guolástuspolitihkkii sihke našonála ja báikkálaš dásis. Mii áigut lávga gulahallat sámi guolásteaddjiiguin ja eará báikkálaš oasálaččaiguin ealáhusas, dadjá Thomassen loahpas.
 
(Gáldu: Sámedikki preassadieđáhus)

Gulahallanolmmoš:

Ann-Mari Thomassen, sámediggeráđi lahttu. Tlf. mánnodaga, distaga ja bearjadaga 95168941 ann.mari.thomassen@samediggi.no

Norsk versjon