Deatnogátti sámiid searvi-NSR áigu várjalit luondduluosa

Sámesearvi lea duhtavaš go evttohuvvo gieldit luossabiebmanrustegiid Deanuvuonas. Deanučázadat lea máilmmi deaŧáleamos luondduluossaeatnu ja Deatnu lea Norgga ja Suoma rádjaeatnu. Deanuluossa lea deaŧálaš sámi kultuvrii.

- Mii leat hui duđavaččat go beassat eret luossabivdinrustegiin Deanvuonas, cealká NSR riikkastivrraáirras Ingrid Nordal kommenteredettiin Ráđđehusa evttohusa várjalit Deanu luondduluosa amaset gillát luossabiebmanrustegiid olu báhtaran luosaid ja dávddaid geažil. – Dát lea áibbas mávssolaš boahttevaš luossabivdui Deanus, Nordal cealká.

Ingrid Nordal lea maiddái Deanu luossaguolásteddjiidsearvvi jođiheaddji, ja muitala ahte Deatnu šaddá našunála luossaeatnu. Dat mearkkaša ahte ii leat lohpi bidjat johtui ođđa doaimmaid mat sáhttet hehttet luondduluosa. Huksendoaimmat deanunjálmmis ja doaimmat mat sáhttet nuoskkidit leat gildojuvvon. Luossanálli našunála luossaednuin galgá vuoruhuvvot eará doaimmaid ovdalii, juste luondduluosa dihte.

Ingrid Nordal, mátketlf. 41315165