Čállingoddejođiheaddji instruksa (PDF)

1 ČÁLLINGODDEJOĐIHEADDJI BARGGUT JA GEATNEGASVUOĐAT RIIKKASTIVRRA EKTUI

1.1 Čállingoddejođiheaddji barggut
Čállingoddejođiheaddji virgáduvvo 4 jahkái hávális. Čállingoddejođiheaddji doaimmaha riikkastivrra ja nuoraidlávdegotti čállingotti dáid olis; instruksa, bargošiehtadus, njuolggadusat ja ovttaskas mearrádusat.

Čállingoddejođiheaddji galgá buoremus lági mielde fuolahit lihtu materiálalaš ja immateriálalaš árvvuid. Son galgá leat oskkáldas lihtu beroštumiide ja barggadettiin álo vuhtii váldit dan mii lihttui lea buoremus.

Čállingoddejođiheaddji lea riikkastivrra/bargolávdegotti instrukšuvdnaválddi vuollásaš ja rapportere riikkastivrii ja bargolávdegoddái. Geavatlaš dilis lea NSR jođiheaddji čállingoddejođiheaddji lagamus hoavda. Riikkastivra / bargolávdegoddi galggá addit čállingoddejođiheaddjái dárbbašlaš friddjavuođa doaimmahit beaivválaš bargguid vai eai heahttejuvvo dábálaš barggut.

Čállingoddejođiheaddji geatnegasvuohta lea veahkehit nuoraidlávdegotti sin barggus go sii dáhttot veahki. Čállingoddejođiheaddji galgá maid veahkehit válgalávdegotti sin barggus. Čállingoddejođiheaddji sáhttá maid bargat bargguid mat gullet Sámediggejovkui go NSR, joavku ja čállingoddejođiheaddji leat dan alde soahpan.

Čállingoddejođiheaddji ovddasvástádus lea fuolahit lihtu beaivválaš jođiheami, mearriduvvon strategiijaid, plánaid ja bušeahttaid ja eará stivramearrádusaid olis, dán stivreninstruvssa rámmaid siskkobealde.

Riikkastivra ja bargolávdeoddi sáhttet fápmudit čállingoddejođiheaddji mearridit sierranas áššiid dahje dakkár áššiid main ii sáhte riikkastivrra dahje bargolávdegotti mearrádusa vuordit almmá lihtu vahágahttima haga. Riikkastivrii dahje bargolávdegoddái galgá farggamusat muitaluvvot mearrádusa birra.
 
1.2 Eambbo čállingoddejođiheaddji bargguid birra
Čállingoddejođiheaddji galgá bearráigeahččat ahte lihtu rehketdoallu lea lága ja láhkaásahusaid mielde ja ahte ruhtahivvodathálddašeapmi lea ordnejuvvon govttolaš ja oadjebas vuogi mielde.

Čállingoddejođiheaddji fuolaha NSR mielahttoriegistara ja galgá bagadallat ja čuovvut mielde mo báikkálaš searvvit fievrridit miellahttoregistariid.

NSR arkiiva lea čállingoddejođiheaddji ovddasvástádus.

Čállingoddejođiheaddji lea NSR neahttasiidduid doaimmaheaddji, ja vállje maid galgá almmuhit www.nsr.no neahttasiidduide. Doaimmaheaddji bearráigeahččá ahte artihkkalat, digáštallamat, guossegirjji čállosat, govat ja eará leat dakkár hámis ahte sáhttet almmuhuvvot neahttasiidduide.

Čállingoddejođiheaddjis lea dearvvašvuođa, birrasa ja sihkárvuođagažaldagaid ovddasvástádus čállingottis, dieđiha bargiid AA-registarii ja eret AA-registaris, vuolláičállá livnnetbáhpiriid ja eará almmolaš dokumeanttaid main ii dárbbaš leat vuolláičállinvuoiggalačča vuolláičála.

Čállingoddejođiheaddjis lea ovddasvástádus ja geatnegasvuohta bargoroasmedáhkádusa, bákkolaš penšuvdnadáhkádusa ja stohpogálvodáhkádusa ordnet.

Čállingoddejođiheaddji ovddasvástádus lea šiehtadiid gálvo- ja bálvalusvuvdiiguin, nu go mat ráđđeaddiiguin/konsuleanttaiguin, web-buvttadeddjiiguin, dulkkaiguin ja jorgaleddjiiguin, rehkedolliin, revisorain ja kanturteknihkalaš bálvalusaid vuvdiiguin ja eará.

Čállingoddejođiheaddji sáhttá evttohit Bargolávdegoddái makkár ođđa áššiid áiggošii oastit. Čállingotti jođiheaddji sáhttá oastit kantuvra- ja gulahallanreaidduid mearriduvvon bušeahta siskkobealde.

Čállingoddejođiheaddjis lea fápmudus dohkkehit luohttámušolbmuid ja bargiid mátkerehkegiid, oktan buot lávdegoddiid mátkerehkegiiguin ja ordnet máksimiid rehkedoallofitnodaga báŋkulisttuid mielde. Jođiheaddji čállá vuollái čállingoddejođiheaddji mátkerehkegiid ja goluid. Čállingoddejođiheaddji galgá ovttasráđiid Baroglávdegottiin ráhkadit detáljabušeahta ja ruhtadanplánaid mat gullet beaivválaš doibmii. Čállingoddejođiheaddji čállá vuollái buot eará rehkegiid mat bohtet ja fuolaha beaivválaš bušeahttadárkkisteami.

Čállingoddejođiheaddjis lea, riikkastivrra addojuvvon prokura mielde, maid fápmudus geavahit buot NSR báŋkokonttuid, doaimma dárbbuid ektui.

Čállingoddejođiheaddji ii sáhte maŋgeláhkái, iige goassege, máksit alcces dahje lagaš fulkkiide ruđa mii ii leat fásta bálka/ruhtadeapmi almmá bajibučča čálalaš fápmudusa haga. Fápmudus galgá čuovvut rehkedoalu mielde mielddusin.

Čállingoddejođiheaddji ii sáhte:

• čađahit oastimiid mat eai leat riikkastivrra mearriduvvon bušeahta siskkobealde, earret dalle go bargolávdegoddi dahje jođiheaddji dan dohkkehit,
• oastit dahje vuovdit oamastemiid, earret billehuvvon/geavahuvvon kantuvrareaidduid, stohpogálvvuid dahje eará maid lihttu ii šat geavat,
• oastit dahje vuovdit fásta oamastemiid/eatnamiid, 
• eará disposišuvnnaid čađahit mat lihtu doaimma mielde leat eahpedábálaččat dahje hui stuorrát/dehálaččat.

1.3 Stivraáššiid ráhkkaneapmi
Čállingoddejođiheaddji galgá ovttas jođiheddjiin čállit áššečilgehusaid, ráhkkanahttit ja bidjat áššiid riikkastivrra ovdii vai buot stivralahtut ožžot buori meannudan- ja mearridanvuođu.

Čoahkkingohččumiid ja buot áššiid dárbbašlaš dokumeanttaid galgá ordnet buori áiggemeari siskkobealde vai stivralahtuid ráhkkaneapmi šaddá buorre.

Čállingoddejođiheaddji ja/dahje jođiheaddji árvvoštallamat ja mearrádusevttohusat galget leat mielde stivračoahkkima čoahkkingohččumis, dahje eará meannudanvuogi gohččumis, man jođiheaddji lea mearridan.

1.4 Searvanvuoigatvuohta stivrii
Čállingoddejođiheaddjis lea vuoigatvuohta ja geatnegasvuohta oassálastit riikkastivrra áššemeannudeamis ja lea cealkinvuoigatvuohta, jos riikkastivra ii leat mearridan eará juste dan áššis.

1.5 Čilgengeatnegasvuohta
Čállingoddejođiheaddji galgá poasttaid čállit jorunálii ja dieđihit riikkastivrii makkár dieđut, reivvet ja eará bohtet organisašuvdnii. Čállingoddejođiheaddji ja jođiheaddji soahpaba buriid bargodábiid poastajournálaid ektui.

Čállingoddejođiheaddji galgá 4 geardde jagis ráhkadit rehketdoalloraportta man sádde riikkastivrii cuoŋománu 10. beaivvi, suoidnemánu 10. beaivvi jnv. mas čilge lihtu boađusovdáneami bušeahta ektui.

Čállingoddejođiheaddji ovddasvástádus lea vel čilget sierranas áššiid lagabuidda jos riikkastivra nu dáhttu. Dakkár čielggadeami sáhttet maid ovttaskas stivralahtut gáibidit.

1.6 Čállingoddejođiheaddji ovddasvástádus stivramearrádusa čađahit
Čállingoddejođiheaddjis lea ovddasvástádus čađahit daid mearrádusaid maid riikkastivra dahká jos riikkastivra ii leat mearridan eará.

Ođasmahtton juovlamánus 2006