Departemeanta mieđiha boasttuvuođa

Justisdepartemeanta mieđiha ahte ledje berret sámi fágačehpiid ja Sámedikki ge váldit mielde gulaskuddamii go dál áigot ásahit sierra viesuid gos illástuvvon mánát dutkojuvvojit.

Norgga Justisdepartemeanta mieđiha ahte sii ledje berret sámi fágačehpiid ja Sámedikki ge váldit mielde gulaskuddamii go dál áigot ásahit sierra viesuid gos illástuvvon mánát dutkojuvvojit, lohká Justisdepartemšantta Stáhtačálli, Anne Rygh Pedersen. Norgga Sámiid Riikasearvvi sámediggejoavku dat lei cuiggodan eiseválddiid go dán fálaldaga ásaheames oalát váilot sámi fagačehpiid rávvagat. Stáhtačállit šálloša go sii leat nie meaddán.

- Leat ilus go Sámediggi lea cuiggodan dán ášši, ja dieđusge dárbbašit rávvagiid das mot sámi mánáid na nuoraid buoremusat sáhttá dustet dákkár áššiin, lohká Rygh Pedersen.

Departemeanta áiggui čađahit johtilis gulaskuddama ovdalgo álggahedje geahččalanortnegiin dán , muhto de lei beare hoahppu ja vajalduhtte Sámedikki čilge Rygh Pedersen

Eai ráhkkanan

Barnas Hus , dahje manaid viessu lea ođđa ásahus maid áiggošedje ásahit vuos golmma sadjái  norggas gosa čohkkejit fagačehpiid ja politiaid vai mánát beasasedje leat oadjebas dilis go dutkojuvvojit illástan áššiin. Norgga Sámiid Riikasearvvi sámediggeáirras Rita-Alise Porsanger cuiggodii árabuš dán vahkus eiseválddii garrasit go eai leat moktege ráhkkanan mo sámi mánáid ja nuoraid galget dustet dákkár viesus. Su mielas lea dohkketmeahttun go eiseválddit eai leat smiehttan mo sámi mánáid ja nuoraid áigot dustet dien ásahusas  go bohtet dutkamiidda illástan áššiin.

Eai leat buorit ákkat

Stáhtačálli Anne Rygh Pedersen mieđiha ahte sis eai leat makkárge buriid ákkaid vajalduhttit Sámedikki ja sámi fágabiirrasa dán oktavuođas. Diekko fertejit buoridit iežaset dábiid. Sii guhkidit goit dál guláskuddan áiggi.

- Mii leat bivdán oažžut cealkámuša ovdal ođđajagimánu manjemuš beaivvi, jus nákceše dan. Fálaldat galgá šaddat nu buorren go vejolaš buot mánáide  Norggas geat leat  vásihan  seksualalaš illástemiid dahje eará lágan veahkaválddalašvuođa. Dalle galgá dákkár mánáid viesus maid leat čehppodat duostut mánáid geain lea iešguđet ge lágan kultuvrralaš duogáš, lohká Rygh Pedersen.

(Gáldu: Sámeradio neahttaođas)