Davviguovllut ja eamiálbmogiid vuoigatvuođat guovddážis riikkaidgaskasaččat 

Davviguovloovddideapmi, olmmošvuoigatvuođat ja dálkkádatrievdamiid váikkuhusat berrejit leat guovddášsuorggit Sámedikki riikkaidgaskasaš barggus boahtteáiggis. Dan oaivvilda Sámediggeráđđi, mii čalmmusta dieđáhusa “Eamiálbmogiid boahtteáiggi ovddideapmi” Sámedikki dievasčoahkkimis 2006 skábmamánus.

- Mii áigut nannet rájárastá barggu ja ollu bidjat fuomášumi riikkaidgaskasaš áššiide boahttevaš áiggis. Eamiálbmogat ellet garra deattu vuolde industriija dáfus, kultuvrralaččat ja dálkkádatlaččat. Riikkaidgaskasaš ovdáneapmi báidná sakka eamiálbmogiid ja dan maid eanet fertet báidnigoahtit eamiálbmogiid jietna, oaivvilda Sámedikki presideanta Aili Keskitalo.

Sámediggeráđđi lea evttohan ollu doaibmabijuid mat galget nannet olmmošvuoigatvuođaid ja nie váikkuhit ahte eamiálbmogat duohtavuođas sáhttet mearridit iežaset ovdáneami ja ieža gozihit beroštumiiddis riikkaidgaskasaččat. Mihttomearrin lea sihkkarastit dássásašvuođa ja ovttalágan ovdánanvejolašvuođaid buot olmmoščearddaide.

Sámediggeráđđi háliida danne ásahit mekanismmaid nu ahte sámiide ja eará eamiálbmogiidda lea vejolaš sihkkarastit eamiálbmot guovlluid minerála- ja petroleumadoaimma ja eará resurssaid roggamis boahtán oasi badjebáhcagis, ja ahte ásahuvvojit etihkalaš ja olmmošrievttálaš standárddat ealáhuseallinoasálaččaid váste mat doibmet eamiálbmotguovlluin.

- Dát mearkkaša ahte stáhtat dohkkehit eamiálbmogiid iešmearridanvuoigatvuođa ja ahte eamiálbmogiidda addojuvvo iešheanalis jietna dain orgánain gos eamiálbmotpolitihkka hábmejuvvo. Eamiálbmogiidda čuohčá hui sakka deaddu industriija, stuorraservdoaga ja dálkkadatrievdamiid beales. Jos eamiálbmotservodagat galget sáhttit váikkuhit konstruktiivvalaččat ja sihkkarastit iežaset baohtteáiggi, de fertet mii oažžut vuoigatvuođa, vejolašvuođa ja resurssaid searvat riikkaidgaskasaš bargui, dadjá Keskitalo. 
 
(Gáldu: Sámedikki preassadieđáhus)

Aili Keskitalo, sámediggepresideanta Tlf. 78 47 40 00 / 971 29 305