Norgga Sámiid Riikkasearvvi sámediggejoavku čujuha gulaskuddanreivii – Raporta geahččalanprošeavtta ásaheamis mas ođđa vuogi mielde gažadit mánáid geat leat šaddan vásihit illástemiid ja eará, nugohčoduvvon ” Barnas hus”.

Dehálaš prošeakta

NSR sámediggejoavku atná prošeavtta hui dehálažžan. Dehálaš lea fuomášit ja dikšut mánáid geain leat dramáhtalaš traumat danne go sii leat šaddan gillát seksuálalaš illástemiid dahje šaddan oaidnit cábmimiid lagaš olbmuid gaskkas.

Sámi perspektiiva váilu

- Mii leat geahččan raportta ”Mánáid viessu” iige doppe oidno gostege sámi perpektiiva. Dat ii leat ságastallojuvvon, iige váldojuvvon mielde, muitala Rita-Alise Porsanger. – Mediačállosat, earret eará Guovdageainnus, livčče iešalddis galgan fuomášuhttán sin ahte sámi perpektiiva ferte leat mielde ja guovddážis prošeavttas, oaivvilda son.

Ii berre gal ákkastallat dainna lágiin ahte bidjá joavkkuid vuostálaga, muhto mii aŋkke leat čujuhan dasa ahte sihke Mira sisafárrejeddjiid- ja báhtarannissoniid ressursaguovddáš, ja Sisafárrejeddjiid dearvvašvuođa- ja sosiálajoavku leat ožžon vejolašvuođa buktit cealkámušaid dán áššis. NSR sámediggejoavku atná dehálažžan ahte sisafárrejeddjiid áššit leat fárus, muhto jearrá gosa sámi áššit leat šaddan.

Konvenšuvnnaid rihkkumin

Dán áššis orru NSR sámediggejoavkku mielas leamen nu ahte olu lágat ja konvenšuvnnat leat rihkkojuvvon: vuođđolága §110a, ILO-konvenšuvdna 169, ON olmmošvuoigatvuođakonvenšuvdna ja ON mánáidkonvenšuvdna. NSR sámediggejoavku oaivvilda váilevaš sámi cealkámušat dagahit ahte ollu áššit mat gusket sámi mánáide  nuoraide eai boađe mielde, eaige čađahuvvo doarvái bures. Jos sámi fágaolbmot oktan Sámedikkiin livčče váldojuvvon mielde prošektii ja gulaskuddamiidda, de livččiimet garvan dákkár váttisvuođa.

Norgga Sámiid Riikkasearvvi sámediggejoavku lea bivdán čálálaš vástádusa das manne sámi fágaolbmot ja Sámediggi eai leat beassan buktit cealkámuša dán áššis. Mii leat maid sihtan diehtit mo sii leat jurddašan váldit vuhtii sámi perspektiivva ja gii dan galgá dahkat, muitala Rita-Alise Porsanger.

Gulahallanolbmot:

Rita Alise Porsanger, sámediggeáirras Tlf.: 98202439 ritaalis@start.no
Klemet Erland Hætta, sámdiggeáirras Tlf.: 918 71 744 klemet@lycos.com