Randi Skum lea Norgga Sámiid Riikkasearvvi (NSR) sámediggeáirras ja sámediggeráđi lahttu. Son lea maid Norgga-Ruota ođđa boazoguohtunkonvenšuvnna šiehtadallanjoavkku lahttu. Šiehtadallanjoavku nammaduvvui Gonagaslaš resolušuvnna bokte 04.11.2005.

- Lávdegotti evttohus ii čilge maidege dološ vieruiduvvanrievtti birra, danne go dat lea lávdegotti mandáhta olggobealde, cealká Randi Skum.

Ođđa mandáhtta mearriduvvui nu go Ruoŧŧa ja Norga ledje soahpan. Dološ vieruiduvvanriekti váldojuvvui eret mandáhtas, danne go dološ vieruiduvvanriekti lei dakkár váttis gažaldat mii dagahii ahte ovddeš šiehtadallamat boatkanedje.

- Mun dieđán ahte dološ vieruiduvvanrievttis lea leamaš olu sáhka. Riikkarájahis boazodoallu boahtá dieđosge dološ vierus. Nu oaivvildii ovddeš šiehtadallanjoavku, ja nu oaivvilda dálá šiehtadallanjoavkuge. – Ovddeš šiehtadallanjoavku ii nagodan soahpat das man viiddis riekti lea ja makkár váikkuhusat vieruiduvvanrievttis galggai leat dán áššis. Ii lean imašge ahte šiehtadallamat boatkanedje ovddit háve, danne go lávdegottis ii lean (iige dálge leat) gealbu árvvoštallat man viiddis riekti lea ja makkár váikkuhusat vieruiduvvanrievttis galgá leat otná riikkarájahis boazodoalus.

Dološ vieruiduvvanriekti ii guoskka dušše riikkarájahis boazodollui mii lea Norgga ja Ruota rájás, muhto maiddái siskkáldas áššiide boazodoalus Ruoŧa bealde ja Norgga bealde. Dat lea hui váttis gažaldat ja čielggadanbargu lea sihke viiddis ja áddjái. Danne lea stáhta várra jurddašan áiggi birra ja jurddašan man guhká dákkár čielggadeapmi ádjánivččii, ja atnán dehálažžan oažžut ođđa konvenšunna áigái dál.
--------------------------------
Gulahallanolmmoš: Randi Skum tlf. 97090338
Preassagovat dás.