- Stáhtalaš lávdegoddi mii čielggada sámi vuoigatvuođaid lullelis Finnmárkku (sámi vuoigatvuođalávdegoddi 2) galgá gárvvistit evttohusastis boahtte geasi. Dalle beassat diehtit mo boahtteáiggis berre hálddašit Statsskog eatnamiid Romssa fylkkas. Ii leat dohkálaš juste dál plánegoahtit dákkár dramáhtalaš sisabáhkkemiid, cealká Mikalsen.

Stuorra huksenplánat

Statskog muitala neahttasiiddustis ahte sis lea plána ráhkadit 18-ráiggi golfašilju, 160 alladásibartta, helikopterseaivunšilju, caravanbáikki, spábbačiekčanšilju, luisttehaga ja ollu eará.

- Statsskog dadjá ahte sii leat áigumin geavahit investoriid, muhto lea áibbas čielggas ahte sii leat áigumin diinet dás, joatká Mikalsen. Ii han leat sihkár ahte Statskog lea rievttes eanaeaiggátge. De ii leat riekta ahte Statsskog SF vuovdá eatnamiid ja riggo dainna juste dál go čielggadanproseassa lea jođus.

Čáhpput-vuovdi lea ovdamearka

 – Čáhpput lea rádnágilis Olmmáivággi ja dat lea buorre ovdamearka das mo báikki olbmot leat geavahan eatnamiid ja ožžon hálddašan- ja eaiggátvuoigatvuođa stuorra meahcceguovlluide, lasiha Mikalsen.

- Norgga Sámiid Riikkasearvi (NSR) lea prinsihpalaččat áibbas vuostá ahte stáhtaeatnamiidda galgá báhkket go vuoigatvuođadilálašvuođat eai leat čielgasat. Statsskog ii leat vaikko gii. Stáhtalaš ásahus ferte váldit vuhtii eamiálbmogiid vuoigatvuođaid mat leat nannejuvvon earret eará ILO konvenšuvnnas 169, cealká Mikalsen.

Berrešii leat oahppan Finnmárkkulágas

Mikalsen oaivvilda ahte Statskogas dál berrešii leat dan mađe ollu máhttu ahte ipmirdit ahte dát ii dohkke. – Sii berreše leat oahppat dan proseassas mii lei ovdal Finnmárkkulága. Mikalsen oaivvilda ahte mii fertet veaháš imáštallat lea go Statsskog bargamin dán go eai dieđe, vai leat go mieleavttus doapmamin hukset Romssa fylkkas danne go dihtet mo Finnmárkkus lea. – Jos sii leat mieleavttus bargamin, de gal ferte cuiggodit, joatká Mikalsen.

Omasvuona suohkan lea ráhkadeamen ođđa areálaplána ja ferte geahčadit dáid áššiid, earret eará Statsskog stuorra huksenplánaid Ivgovuovddis, cealká Tor Mikalsen. – Suohkan berre gáibidit ahte plánat bissehuvvojit dassá go Sámi vuoigatvuođalávdegoddi 2 lea buktán čielggadusa cealká Mikalsen, ja áigu loktet ášši NSR sámediggejovkui.

Statskog neahttasiidu dás ja Eanandoallo- ja biebmodepartemeanta dás.

Gulahallanolmmoš:
NSR sámediggeáirras Davvi-Romssas, Tor Mikalsen, tel. 99 32 67 44