Norgga Sámiid Riikkasearvvi Nuoraidlávdegoddi (NSR-N) lea hui ilus go NRK Sámi Radio lohpida ráhkadit eambbo nuoraidprográmmaid.

Muhto, NSR-N váillaha Ántte filmma, Skáidi ja eará sámi filmmaid ja tv-ráidduid mat leat leamaš oaidninláhkái ovdalis. Mii háliidit maiddái ahte nuoraidprográmmat ja guoimmuhan-prográmmat biddjojuvvojit nehttii nugo kákáos tv-šovv, hillagurra.com ja eará.

NRKs lea sierranas ovddasvástádus sámegiela vuhtii váldit og lea álbmoga ásahus. NSR-N mielas lea maiddái dehálaš ahte olbmot besset geahččat prográmmaid ja filbmaráidduid sámegillii - dát nanne sihke mánáid ja nuoraid giela, identitehta ja gullevašvuođa. Ja leage dehálaš giellagáhtten bajásšaddi buolvvaide.

NSR-N rámida 60-jagi ávvudeaddji NRK Sámi Radio go maŋemuš jagiid lea viiddidan sámi mánáid-tv sáddenáiggi ja bidjan maŋemuš mánáid-tv prográmmaid viežžanláhkái neahtta-tvii. Dát lea buorre álgu, muhto mis leat ain ollu hástalusat. Earret eará váillaha NSR-N sámegielat oahpahus tv-ráidduid iešguđetge fáttáin, go Sámis leat váilevaš oahpuneavvofálaldagat.

Lea oahpes ášši ahte ođđamállet teknihkalaš veahkkeneavvut ja viežžanvejolašvuođat leat stuorra ovdamunni eamiálbmot- ja unnitloguálbmogiid gielaide, danne go de sáhttá geahččat prográmmaid iežaset gillii sorjakeahttá das gos geográfalaččat lea ja dan áiggis maid ieš sihtá. NSR-N sávva ahte NRK Sámi Radio oččošii resurssaid, dahje vuoruha resurssaid addit vel buoret fálaldagaid mánáide, nuoraide ja olleslobmuide ja sávva ávvudeaddjái ain lihku buori bargguin.

Gulahallan:
Káre-Elle Partapuoli
mátketlf. 907 97 925

Káre-Elle lea listtus Nuortaguovllu válgabiires 2009

Denne teksten på norsk