Searvadahttin- ja girjáivuođadirektoráhta / Integrerings- og mangfoldsdirektoratet (IMDi) lea maŋemus jagiid bargan dulkabálvalusaid kvalitehta buoridemiin Norggas ja ráhkadan guovttegielatvuođageahččaleami buotlágan gielaide mat dulkojuvvojit Norggas, earret sámegiela. Dál lea áigi sámegiela maid váldit mielde.

NSR rávve IMDi geavahit seamma bargovuogi ráhkadettiin geahččaleami sámegillii go IMDi lea geavahan ráhkadettiin eará gielaid geahččalemiid. IMDi sáhttá oastit gelbbolašvuođa dain ásahusain main lea sámegiella allaoahppu; Sámi allaskuvla ja Romssa universitehta. Áinnas maid gulahallat Sámedikki giella- ja oahpahusossodagain.

Norgga dulkaregistar

Jos galgá beassat Norgga ođđa almmolaš dulkaregistarii, Tolkeportalen, de lea unnimusgáibádus ahte ferte leat ceavzán ToSPoT geahččaleami, dahje ferte leat čađahan dulkaoahpu. Dál ii leat vuos oktage sámi dulka beassatn Norgga almmolaš dulkaregistarii. NSR rávve buot sámi dulkkaid registreret iežaset Norgga dulkaregistarii (tolkeportalen.no).

Buorre dulkagelbbolašvuohta

NSR oaivvilda ahte lea dehálaš bearráigeahččat ahte sámi álbmoga dulkabálvalusain lea buorre dássi, ja ahte konferánsadulkomis maid lea buorre dássi. ToSPoT geahččaleapmi sámegillii lea lávki rievttes guvlui. NSR diehtá ahte eanas sámi dulkkain ja jorgaleddjiin leat barggut doarvái ja ahte hárve dárbbašit čujuhit formála dulkagelbbolašvuhtii, muhto NSR oaivvilda ahte formála gáibádusat guhkit áiggi vuolde lea buorrin sámegillii.

NSR ávžžuha eiseválddiid ráhkadišgoahtit ToSPoT geahččaleami sámegillii.