- Olbmot miehtá Norgga bohtet deike min guovlluide bivdit rievssahiid. Dál eai gávdno makkárge ráddjejumit ja bivdit besset báhčit nu olu rievssahiid go beare sihtet ja bivdit nu guhká go nagodit, cealká Guovdageainnu sámiid searvvi stivralahttu Peer Gaup. Guovdageainnu sámi searvi han leige evttohan cealkámuša NSR riikkačoahkkimii. Guovdageainnu sámiid searvi ballá ahte dákkár viiddis bivdu čuohcá hui garrasit go lea sáhka rievssatbivddu bisuheames, go dál han lassánit hirbmadit dat olbmot geat sihtet bivdit Finnmárkkus.

Sámi eallinvuođđu
- Muhtunat báikegottiin leat nimmorišgoahtán go leat vásihan ahte olbmot geat bohtet eará sajiin bivdet hirbmat ollu, muitala NSR jođiheaddji Silje Karine Muotka ja cealká etihkalaš gažaldahkan galgá go nu hirbmat olu rievssahiid bivdit go lea asttoáiggebivddus.

Muotka čujuha dasa ahte luondduresurssat ja ođasmahtti resurssat, nu go mat rievssat, galggašii leat báikegotti olbmuide ávkin go sii ellet luonddudállodoaluin. Máŋga sámiin lea ain luonddudállodoallu eallinvuođđu. – Dákkár dállodoallu nanne sámi kultuvrra ja bisuha ássama sámi guovlluin, nanne Silje Muotka.

Unnidit bivddu, ii gieldit
Rievssahat lea leamaš sihke valjit ja vánis maŋemus 30 jagi. Buriid jagiin leat leamaš 750000 rievssaha ja heajos jagiin 350000 rievssaha. Vihttanuppelot jagis leat hárvvit ja hárvvit šaddan sáhpánjagit ja sáhpánjagiin han lávejit lassánit rievssahat. Diibmá ledje unnán sáhpánat, ja dat sáhttá váikkuhit rievssahiid lohkui. Bivdoáiggis sáhttá báhčit gitta 50% buot rievssahiin, NINA dieđuid mielde (2000).

- Dáinna cealkámušain mii áigut ovddalgihtii váruhit mo sáhttá geavvat, cealká Silje Muotka. Daid jagiid go leat unnán rievssahat ja unnán čivggat, de lea dehálaš unnidit bivddu.

Muotka cealká áibbas čielgasit ahte ráddjen ferte dáhpáhuvvat fágalaš ákkaid olis. – Go ráddje bivddu, de galget fágalaš ákkat leat vuođđud, iige dás leat sáhka bivddu gieldimis. NSR luohttá dasa ahte Finnmárkkuopmodat hálddaša dán govttolaš vuogi mielde. Rievssatbivddu ráddjen ii leat ođđa ášši. Eará sajiin Norggas ja Ruoŧas leat juo ráddjen bivddu, ja ovdamearkka dihte ásahan ”Bag limits”, muitala Silje Muotka. Son ii jáhke ahte Finnmárku gierdá eambbo bivddu áiggi mielde, jos ii ráddje bivddu.

Vuoruhit báikki olbmuid
NSR mielas lea dehálaš sihkkarastit ahte báikki olbmot besset bivdit. – Finnmárkkulágas lea prinsihppa ahte fylkka álbmot galgá vuoruhuvvot, ja mii doarjut ollásit dán prinsihpa, cealká Silje Muotka.

Muotka oaivvilda ahte bivdu mii lea oassin dállodoalus ferte mannat ovddabeallái astoáiggebivddu. – Mii dohkkehit ahte bivdu lea dehálaš olles álbmogii go olbmot lihkadit ja ožžot buoret dearvvašvuođa. Muhto mii dattege doalahit prinsihpa ahte go resurssat leat vánit, de galgá vuoruhit báikki olbmuid, loahpaha Silje Muotka.

Gulahallanolbmot:
- Silje Muotka, Norgga Sámiid Riikkaservvi jođiheaddji. Telefuvdna: 984 87 576
- Peer M. Gaup, Guovdageainnu sámiid searvvi stivralahttu. Telefuvdna: 950 72 722

Riikkačoahkkima cealkámuš rievssatbivddu birra lea dás: