NSR ja ovttasbargojoavku bivdet Sámediggeráđi oččodit diimmuid sámi kulturgealbofágii joatkkaskuvladásis VK1 ja VK2, seammá prinsihpa mielde go stáhta ruhtada sámegielfága. Diimmut sihkkarastet ahte oahppit geat omd. válljejit sámi kulturgealbofága VK1 og VK2 sáhttet oažžut dán fága. Stáhta ruhtada automáhtalaččat sámegielfága joatkkaskuvladásis ja máksá ruđa skuvlaeaiggádii juohke oahppi namas. Ortnet sihkkarastá ahte oahppit, geat válljejit sámegiela, ožžot sámegiela oassin joatkkaskuvlaoahpus.

Ii álggahuvvo
Ruhtadanortnet berre maid gustot sámi kulturgealbofágii, juohke oahppi namas VK1 ja VK2 dásis. Unnán oahppit válljejit dán fága ja fága vuoittahallá go lea sáhka das makkár fágaid joatkkaskuvla sihtá bidjat johtui. Gáržžes skuvlabušeahtat dagahit ahte fágat, main leat unnán oahppit, vuoittáhallet fágaide mat geasuhit eambbosid ja mat leat guhkit áiggi oahpahuvvon. Sámi kulturgealbofága ii biddjojuvvo johtui ruđalaš veahki haga.

Máhtolašvuođabuorideapmi ja sámi fágat
Sámi kulturgealbu lágiduvvo daidda geat juo leat álgán fágain ja lágiduvvo guhkimusat guokte jagi vel. Fága joatká sámi historjafágas ja servodatfágas, Kunnskapsløftet olis. Šaddá váttis oažžut doarvái ohppiid dán fágii. NSR ja ovttasbargojoavku bivdet Sámediggeráđi loktet ášši departementii vai boađáše ekonomalaš juolludeamit ja sierranas diibmojuohkimat sámi oahpposuorgefágaide/prográmmafágaide nu go sámi giellafágainge lea.

Gulahallanolbmot:
Ann Mari Thomassen, telefuvdna: 900 57123

Kjersti Myrnes Balto, telefuvdna: 415 03 529