Nuoraidpolitihkkarin vásihan dávjá go lean johtimin Sámis ahte váilot dieđut sámi diliid birra, erenoamážit eará guovlluid go iežas guovlluid birra. Vuostálastin dihte eahpeoiddolaš miella¬guottuid nugo omd. “etnosentrisme”, sáhttit fierpmádaga bokte fuolahit ahte nuorat iešguđet sámi guovlluin ožžot buriid oktavuođaid gaskaneaset. Fierpmádaga háhkama bokte sámi nuoraid gaskkas sáhttit positiivvalaš vugiin buoridit máhtolašvuođadási ja gilvit dieđuid viidáseappot sámi servodagas.
Nannet identitehta
Nuorain Norgga bealde Sámi lea iešguđetlágan duogáš sámegiela ektui ja sin iežaset sámi identitehta ektui, ja lea vahát go dát sáhttá sirret iešguđet sámi joavkkuid.
Dán lágan miellaguottuid huksenbargu, man oktavuođas mii addit sámi nuoraide vejolašvuođa oahppat guđet guimmiineaset, leat mielde buorideamen máhtolašvuođa sámiid birra sámiid gaskkas. Dát lea maiddái mielde nannemin nuoraid oktasaš sámi identitehta ja oktasaš sámi kulturárbbi. Sámi servodagas gávdno erenoamáš girjáivuohta, ja dat go oahppat guđet guimmiineamet nannešii sihke ovttaskas olbmuid ja sámi servodaga.
Ovttasbargat
Fierpmádaga sáhttá čađahit iešguđet dásis, nugo omd. ovttasbarggu bokte joatkkaskuvllaid gaskka gos leat sámi oahppit, Sámedikki nuoraidpolitihkalaš lávdegoddi aktiivvalaččat mielde barggus, ovttasbargošiehtadusat iešguđet fylkkagielddaiguin ja eará vejolaš oasálaččaiguin.
NSR ovttasbargojoavku oaidná ahte lea stuorra dárbu arenaide gos nuorat sáhttet deaivvadit, ja gos nuorat ožžot stuorát áddejumi ja ohppet árvvus atnit guđet guimmiideaset.
NSR nuoraidlávdegoddi
Denne teksten på samisk
Kommenter denne artikkelen