NSR evttoha ahte Sámediggi ásaha ”Sámi mediafoandda” mii galgá sáhttit investeret sámi mediaásahusaide. Formálalaččat NSR ii evttot makkárge ráddjemiid das makkár sámi mediaide foanda sáhttá investeret, muhto oaivvilda foandda álggus galgat sámi aviissaid nanusmahttit vai nákcejit almmuhit beaivválaš sámi aviissa. Beaivválaš sámi aviisa mii maiddái almmuhuvvo neahtas sihke nanne sámi áššiid beroštumi ja lokte giela árvvu ja lea áibbas dárbbašlaš siviila sámi servodaga huksemii.Mihttomeari galgá leat olahan maŋimustá geassemánu 1. b. 2009.
Buot giellasuopmaniidda
NSR oaidná ahte dát áššit gullet oktii; beaivválaš sámi aviisa ja sámi čálakultuvrra ovddideapmi sámiid gaskkas. Ođđaáigasaš servodat mas lea šláddjes ja rikkis sámi čálakultuvra lea valljivuođa servodat. Dán oktavuođas gullet dát áššit oktii; ođasdárbu, čálakultuvrra ovddideapmi ja giellagáhtten. Erenoamážit go lea sáhka smávva sámi suopmaniin nu mo julev- ja lullisámegielas.
Nannet preassadoarjaga
NSR oaivvilda ahte seammas go sámi mediafoanda buktá sámi aviissaide ođđa risikoruđa ja aktiivva oamasteami, de ja ferte ovttas Sámedikkiin bargat Kultur- ja girkopartemeantta guovdu vai: - Preassadoarjja lasihuvvo ja šaddá sámi aviisaalmmuhemiid bissovaš ruhtadan¬čoavddusin. - Preassadoarjja heivehuvvo vai doarju mihttomeari olahit beaivválaš sámi aviisa. Dáčča eiseválddit maid berrejit deattuhit Ruoŧa ja Suoma eiseválddiid ovddasvástádusa beaivválaš sámi aviissain.
Duogáš
Sámedikki dievasčoahkkin celkkii 2006 Stáhtabušeahta meannudettiin (ášši 34/03):
«Sámi preassapolitihka bajimus mihttomearrin lea ásahit sihkkaris ekonomalaš vuođu beaivválaš sámi aviissaid almmuheapmái, vuosttažettiin sámegielat aviissaid.»
Sámiid vuoigatvuohta ođđasiidda iežaset čállingilllii lea bures dohkkehuvvon ja boahtá ovdan stáhta preassadoajaga bokte sámi aviissaide. St. died. nr. 33 (2001-2002) čuožžu ea. ea:
” Sámi aviissain lea stuorra mearkkašupmi sihke informašuvdnagáldun ja bákkodankanálan, ja sámi giela seailluheapmái.”
Dál leat guokte sámegielat aviissa, Áššu ja Min Áigi, ja vel aviisa Ságat mii almmuhuvvo dárogillii. Buot aviissat ilbmet guktii - golbmii vahkus.
Kommenter denne artikkelen
Tips en venn Gå tilbake