Din barggu bokte lea sámi servodat ovdánan máŋggain lávkkiin danne go lehpet čuovvolan ja ollášuhttán váttis politihkalaš áššiid buori vuogi mielde.

Máŋggas leat nuppes válljejuvvon ja servet ođđa sámediggejovkui ja jotket buori barggu sámi servodaga ovddas. Earát heitet, muhto leat ain máŋga vejolašvuođa oassálastit NSR bargui ovddaskuvlui jos ieš sávva ja lea vejolašvuohta. NSR dárbbaša buohkaid máhtu ja vásáhusaid.

Mun giittán din go lean beassan dinguin bargat ovttas dan rájes go válljejuvvojin NSR jođiheaddjit 2003 geasi. Mun lean oahppan ollu mii boahtá ávkin NSR bargui ja NSR bargui Sámedikkis.

Áiggun giittit ovtttasbargoguimmiid buori barggu ja ovttasbarggu ovddas. NSR sihtá ovdánahttit buori ovttasbarggu jos dasa oččošeimmet vejolašvuođa.

Aili Keskitalo

NSR jođiheaddji