Ođđasa lea Egil Olli, Bargiidbellodaga presideantaevttohas bidjan nehttii, ja de čájehuvvo ahte dát ášši leat stuorit go dušše dábálaš kommentára dasa ahte galget go dáččat beassat sámi jienastuslohkui. Bargiidbellodat lea gusto ávžžuhan finnmárkolaččaid oppalaččat ja vel kveanaidge dieđihit iežaset jienastuslohkui.

- In oro jáhkkimin ahte dat lea duohta, vaikko mun logan gal dan maid sii leat čállán, Aili Keskitalo cealká. – Dát billista áiggi mielde Sámedikki sámiid iežaset álbmotválljejuvvon orgánan, man sámit ieža leat válljen. Dát billista Sámedikki legitimitehta, ja Bargiidbellodat berre čilget sihtet go Sámedikki sámiide, vai galgá go maiddái leat orgána buohkaid várás geat eai leat sámit. Dalle han jávká Sámediggi dakkár orgánan go Sámediggi lei jurddašuvvon, ja Sámediggi rievdá oalle johtilit unna-Stuoradiggin masa sámit ieža eai šat beasa.

Go lean lohkan Bargiidbellodaga ruovttusiidduid, de in oainne dál erohusa Ovddádusbellodagas mii siđašii beassat Sámediggái ja doppe doaimmahit heaittihanbargguid, ja Bargiidbellodagas mii sávvá buohkaid sámi jienastuslohkui.