Sámi nuorat gulahallet olu SMS bokte, ja T9 sátnegirji lea buorre veahkkeneavvu dasa.  T9 sátnegirji gávdno juo dárogillii ja NSR-N oaivvilda ahte dat lei áigá juo galgat sámegillii boahtán. - Mii gáibidit ahte politihkkárat váldet duođas dán ášši, dadjá NSR Nuoraidlávdegotti jođiheaddji Káre-Elle Partapuoli.

Dehálaš giellaseailluheapmái

Son čujuha dasa ahte gielladilli šaddá vearrát ja vearrát. -Mii gal leat massimin giela go eat sáhte “chattet” sámi bustávaiguin, dadjá Káre-Elle. Son muitala ahte máŋga sámegielaga čállet dárogillii danne go lea álkkit čállit SMS-dieđu go lea T9 dárogiel sátnegirji. – Lea nu dehálaš váldit sámegiela atnui ođđa teknologias ja ođđa arenain, oaivvilda Partapuoli. Son deattuha ahte dán bálgá ferte čuovvut seailluhan dihte ja ovdánahttin dihte giellamet..

Hástala mobiilafitnodagaid ja politihkkáriid

NSR-N hástala mobiilafitnodagaid ja politihkkáriid bargat áššiin juoga. - Mis ii leat šat gierdevašvuohta vuordit, ja mis lea vuordámuš ahte ášši čoavdášuvvá jođaneamos lági mielde, dadjá Káre-Elle Partapuoli, guhte lea aibbas čielggas dasa ahte golut eai gal galgga leat vuosteággan go lea sáhka sámegiela seailluheamis. - Mii gáibidit ahte politihkkárat váldet ovddasvástádusa min ja min nuoraid boahtteáiggi ovddas, loahpaha NSR Nuoraidlávdegotti jođiheaddji Káre-Elle Partapuoli