Sáhttá leat váttis válljet bellodaga. Mii áigut dás čilget manne NSRs lea buoremus ja eanemus ollislaš nuoraidpolitihkka.

Vássán sámediggeáigodagas ledje hui unnán nuorra áirasat. NSR lea váldán ovddasvástádusa ja áigu rievdadit dan. NSR lea nomineren nuoraid eanas válgabiriid listtuid bajimus sajiide, ja oaidná dárbbu nuoraid válljet Sámediggái. Nuorra áirasiid bokte gullo sámenuoraid jietna Sámiid iežaset álbmotválljejuvvon orgánas, nu go juo galgá ge.

Nuppedáfus Norgga Bargiidbellodat ii leat organiseren makkárge nuoraidbargguid, muhto NSRs lea sierra nuoraidlávdegoddi mii čađat bargá nuoraidáššiiguin. Nuoraidlávdegotti bokte diehtá NSR olles áiggi mii dáhpáhuvvá nuoraid gaskkas.

Sámi festiválain deaivvadit sámi nuorat. NSR sihtá doalahit ja nannet sámi festiválaid lasihuvvon doarjagiid bokte.

Ii buot sámenuorain leat vejolašvuohta oahppat sámegiela, vaikko dat lea lága bokte nannejuvvon. Okta NSR deháleamos bargguin lea bearráigeahččat ahte buohkat ožžot dan oahpahusa mii sidjiide galgá, vai sámegiella seailu.

Giitosat NSRii go joatkkaskuvllaid sámegielohppiin lea stipeanda, mii galgá lasihuvvot boahtte sámediggeáigodagas.

Allaoahpu studeanttaide maid lea dehálaš ásahit stipeandaortnegiid, vai studeanttat lohket sámegiela ja sámi fáttáid. Dainna áigu NSR bargat. Dearvvašvuođa-, kultur-, media- ja vuođđoealáhussurggi oahput eai álo adnojuvvo ”sámi” oahppun, muhto daiguin maid berre bargat sámi oahpahusbarggus. NSR diehtá ahte sámi nuorat ellet máŋggaláhkai ja ahte sis lea máŋggalágan identitehta, ja atná máŋggalágan stipeandortnegiid dehálažžan. 

Dát leat dušše moadde dain nuoraidáššiin mat leat NSR válgaprográmmas ja maiguin NSR áigu bargat sámi nuoraid ovddas. NSR-N lea leamaš mielde hábmemin gárvvis válgaprográmma, ja danne leat válgaprogrammas ollu nuoraidáššit. Mii eat eahpit ge ahte NSR válgaprográmma lea nuoraid válgaprográmma sámediggeválggaide!

Jienas NSR Sámediggeválggas 2005!