Čállán Christina Henriksen,

NSR/ SáB 2. evttohas sámediggeválggaide Várjjat válgabiires

Norgga Sámiid Riikkasearvvi (NSR) válgalisttuin leat sihke ođđa olbmot ja ovddeš beakkánat. NSR sihke ođasmahttá ja doalaha politihkalaš hárjáneami dáid válggaide. Mii leat bidjan čoahkkái nanus ja viiddis joavkku mii ain áigu bargat sámi beroštumiid buorrin. NSR lea friddja sámi organisašuvnda man ii stivre makkárge dáčča váldoorganisašuvdna, ja nu lea leamaš álggaheami rájes 1968. Min váldoulbmil lea sihkkarastit sámiid vuoigatvuođaid.

Okta vuoigatvuohta mas lea sáhka lea giella. Mis leat eiseváldit suoládan min giela, ja mii leat máŋggas. Válgaságastallamis Romssas 20.08.05 dajai BB vuosttaševttohas Gaska-Romssas ahte Sámediggeáirasat geavahit beare unnán sámegiela. Die lea imaš paradoksa go ieš áirras ii smiehta mot su dáčča bellodat ii leat bargan maidege njulget dáruiduhttima billistemiid, vaikko lea leamaš ráđđehusfámus measta buot jagiid maŋŋá soađi.

NSR lea Sámedikkis bargan sámegiela ovddas, vai buot sápmelaččaide galgá leat álkkit oahppat giela. Earret eará leat ásahuvvon movttiidahttinstipeanddat sámenuoraide geat lohket sámegiela joatkkaskuvllas. NSRs leat boahtteáiggi višuvnnat, ja mus lea alddán maid erenoamáš višuvdna; namalassii ahte buot sámi mánát fas galget oahppat sámegiela.

Jienas NSR!

Gulahallanolmmoš:

Christina Henriksen: christina.henriksen@same.net

Giehtatelefuvdna 90 91 91 31