Riidočoavdinráđđi ja politiijat ovttas Kárášjoga nuoraidskuvlla 10. luohkáin lea čađaheamen iskor dehálaš prošeavtta givssideami birra. Sámediggeáirasat besse gullat 10. luohká čállin barggu birra skábmamánus go mánáidáittardeaddji lei Kárášjogas ja dan oktavuođas geigii bálkkašumiid nuoraid čállingilvvus.

Bearjadat Ávviris (12.02.10) oaidnit ahte prošeakta áiggošii álmmuhit nuoraid čállosiid girjin. Girjji álmmuheapmi lea hui áigeguovdil ja NSR vuordá ge ahte sámediggeráđđi oaidná dan ja bijašii ruđa dan almmuheapmái. Nuoraide lea dehálaš ahte áššit ovdánit jođánit ja erenomaš dehálaš ahte girji álmmuhuvvošii ovdal go skuvlajahki nohká ja dan doje go barggut leat dan veardde ođđasat. Girjji álmmuhemiin oahppit maid beasašedje vásihit ahte servvodat atná sin barggu árvvus. 

NSR oaidná máŋga ákka manne dáinna girjjiin galggašii hoahpohit. – Nuoraid čállosat loktejit dehálaš čuolmmaid gos Kárášjoga servodat lea vuolggasadji, muhto mat leat dehálačča maid muđuid servodahkii, sihke sámi ja eará, lohká NSR/SáB sámediggeáirras Gunn-Britt Retter.

NSR bealis oaivvildat dán áššái maid sáhtášii geavahit ovttasbargošiehtadusa Finnmárkku fylkkagielddain luvvet ruhtadoarjaga johtilit, ja seammás maid geatnegahttit Finnmárkku fylkka. 

– Dát prošeakta lea mielde buorideamen Finnmárkku bájasšaddanbáikin ja seammás lea dehálaš ahte girji jođánit boađášii ávkin nuoraide muđui Finnmárkkus. Lea šállošahtti jos girji ii almmuhuvvo ovdal go čakčii, dalle leat dát nuorat juo joatkkaskuvlla oahppit. Mii muitit várra ieža man ollu dáhpáhuva ovtta geasis dán agis, ja nuoraidskuvlla doaimmat lea juo báhcán eará epokii (eallin áigodahkii). – Dát lea maid investeren sámi girjjálašvuođa boahtteáigái, dáid nuoraid seahká sáhttá maid leat gávdnot boahtteáiggi sámi čálliid, loahpaha NSR/SáB sámediggeáirras Gunn-Britt Retter.

----------

På norsk / darogillii