– Muitaleapmi lea somá. Mun jáhkán ahte jus geavahivččii eambbo muitalusaid skuvllas, de šattašii geahppaseabbo geavahit sámegiela njálmmálaččat, erenoamážit nubbingielat ohppiide. – Mun jáhkán ahte muitaleapmi metodan livččii mielde nanneme sámi mánáid ja nuoraid identitehta ja kulturgullevašvuođa, lohká Retter. Son čujuha maiddái dasa ahte kultur- ja máhttogaskkusteapmi dávjá dáhpáhuvvá ge juste njálmmálaččat. – Dat lea iešalddis ágga addjit eambbo saji muitalusaide skuvllas.

– Dál oaidnit ahte storytelling lea bivnnut stuoraservodagas ja ahte dat geavahuvvo márkanastimis ja beaggima buorideamis, ja dat lea vel okta ágga dasa mii berret addit iežamet nuoraide muitalusaid reaidun. Retter muittuha ahte muitaleapmi muđui lea guovddáš elementa eamiálbmotkultuvrrain miehtá máilmmi, maiddái sápmelaččaid gaskkas.

Gunn-Britt Retter deattuha ahte Sámi allaskuvllas lea juo Juoigan ja muitaleapmi viidásetoahppofálaldahkan.  Danne sáhtášii oalle jođánit bidjat eambbo deattu muitalusaide skuvllas, go oahpaheddjiin juo lea dát viidásetoahppu fálaldahkan dán suorggis, loahpaha Retter, guhte ávžžuha Sámediggeráđi bargat viidásat áššiin maid ovddidii dievasčoahkkimii odne – ášši mii oaččui olu doarjaga.

----------

På norsk / darogilli