Sámi nuorra álggaheaddjit

Lea olu sáhka álggahandoaimmain dáid áiggiid. Šaddá deháleabbot ahte deháleabbot oahppat mot galgá fitnodagaid ásahit go almmolaš bargosajiid lohku bissu seammá sásis ja máŋggain lea alla oahppu. ”Nuorra entreprenevravuohta" nammasaš organisašuvnna barggus čájehuvvo ahte sullii 20% (dábálaš lohku lea 4%) dain nuorain geat skuvlla bokte besset oahppi­fitnodagaid geahččalit ieža álggahit fitnodaga, go leat geargan skuvllas. Oahppi­fitnodagaid bokte sii leat oahppan mot álggahit ja doaimmahit fitnodagaid, ja dakko bokte leage álkit ásahit iežas bagosaji go áigi lea láddan. Sámi gilážis Moskkis Divttasvuonas leat mánáid­skuvllas jođihan oahppifitnodagaid maŋimus logi jagi, unnimustá. Nuorra oahppifitnodat­oamasteaddjit leat lihkostuvvan bures.

Eai leat sámi ovddasteadjit –  ”Nuorra entreprenevravuohta” sierra sámi ossodat

”Nuorra entreprenevravuohta” nammasaš organisašuvnna fylkkadásis ii leat oktage gii ovddasta sámi fitnodaga, diehtoinsitušuvnnaid ja sámi váldoorganisašuvnnaid. Áŋgiruššan stivejuvvo almmá sámi almmolašvuođa oassálastima haga. Neahttasiidduid dieđut eai leat sámegillii. Sámi koordinahtorat eai leat virgáduvvon. ”Nuorra entreprenevravuohta” nammasaš organisašuvnna roollastovrras ii leat sámi ovddasteaddji. Sámediggi ii leat namuhuvvon áŋgiruššanbarggu ovttasbargoguoibmin.

Aŋkke gávdnojit moadde sámi nuoraidfitnodaga. Jos sámi ealáhus galgá ovdánit ja ođđa fitnodagat ásahuvvot mat ahtánuššet bistevaš fitnodahkan, de ferte sierra sámi áŋgiruššansuorgi ásahuvvot. - Sámi servodat ii sáhte leat váikkuhanválddi haga dálááiggi stuorimus innovašuvnna­áŋgiruššamis nuorra olbmuid várás, cealká Lulli-Norgga NSR 2. evttohas, Kirsti Guvsám.

- Nuorra sámediggeárrasin mii áigut oččodit sámi ovddasteddjiid nášunála áŋgiruššanbargui, celket NSR nuorra evttohasat. Sin mielas gávpogat ja sámi suohkanat sierraláhkái dárbbašit álggahanáŋgiruššama, danne go leat ollu gáibádusat vuođđoealáhusaide ahte fertejit ovdáhit ja ođasmahttit iežaset. Ferte čohkket diehtobirrasiid ja ealáhusdoaimmaheddjiid, ja ovttastahttit ođđa bargosajiid álggahanáŋgiruššama Sámis.

Buorit jurdagat – unnán konkrehta bohtosat

St. dieđáhusas nr. 33 (2001-2002), Lassidieđáhus St. dieđáhussii nr. 55 (2000–2001) Sámepolitihka birra čuožžu:

Potensiála ođđahutkit galget leat válljedeaddji ealáhusdiđolaš distrikta- ja regionála­politihkalaš gaskaomiid váldo­ulbmiljoavkun. Eanet ođđahutkan­dáidu ja -dáhttu nuorra nieiddaid ja gánddaid gaskkas lea deaŧalaš strategiija. Ráđđehus nanne danne entreprenevravuođa barggu oahppo­vuogádagas, earret eará addimiin organisašuvdnii “Nuorra entrenevravuohta” buoret rámma­eavttuid.

Sierra sámi álggahanáŋgiruššan

NSR 2. evttohasat oaivvildit ahte dán mihttomeari mii berret ain čalmmustit. - Mii áigut ovttas eará NSR áirasiiguin Sámedikkis oččodit sámenuoraid sierranas álggahanáŋgiruššama boahttevaš áigodaga, celket nuorat.

Sámi ealáhusovdáneapmi ferte vuođđuduvvot sámi servodateallimii ja álggahuvvot sámi eavttuid vuođul. - Go ” Nuorra entreprenevravuohta” nammasaš organisašuvdna lea ožžon eambbo ja buoret rámmaeavttuid, de mii imaštallat manne sámi álggahandoaimmat eai leat formaliserejuvvon dán áŋgiruššamis. Dát lea okta ovdamearka das ahte lea nuorra sámediggeárasiidda lea dárbu, celket NSR nuorra 2. evttohasat Lulli-Norgga, Lullisámeguovllu, Gaska-Norlándda ja Lulli-Romssa válgabiiriide.

Eambbo ”Ungt entreprenørskap” birra: http://www.ue.no/

Oktavuođaolbmot:

Kirsti Guvsam, NSR 2. evttohas Lulli-Norgga válgabiires – giehtatlf. 908 35 649

Ellinor Marita Jåma, NSR 2. evttohas Lullisámegbiires – giehtatlf. 916 13 460

Miriam Paulsen, NSR 2. evttohas Gaska-Nordlánddas – giehtatilf. 976 17 377

Susanne Amalie Andersen, NSR 2. evttohas Lulli-Romssas – giehtatlf. 928 35 649