Čálli: Jánoš Trosten

Deanu NSR/ SáB listtu 1. evttohas

Sámeálbmotbellodaga 1. evttohas Stuorradiggái

Marianne Balto Henriksen vikkaha Finnmarken aviisas borgemánu 10. beaivve ahte NSR evttoha Sis-Finnmárkku ovttastahttit oktan stuorragieldan. Dát ii doala deaivása. NSR ii evttot makkárge stuorragieldda ja ii ge lea goassege dan evttoha. Igge NSR dan boađe evttohit ge.

Gielddaid ovttatstahttima leat bargiidbellodatsátnejođiheaddjit Kommunenes Sentralforbundas(KS) áŋgiruššan ja dán digáštallamii mun ge lean searvan. Balto Henriksen galggašii vuosttažiin čielggadit iežas bellodaga áššiid, ii ge dádjut go váillojit politihkkálaš áššit. Mun dáhtun digáštallat Norgga boahtteáigge gielddastruktuvrra. Dan birra lea dát ášši.

Lea nu ahte bargiidbellodaga lea vierrun ”smiehtta” álbmoga, ja bellodagas ii leat vierrun diktit servodaga olbmuid smiehttat. Dákkár boaressosialistálaš jurddašeapmi lea lihkkus jávkan stuorra osiin servodagas. Muhtin oasit dás leat ain čiekŋalit gitta Bargiidbellodagas, ja dan lea ge Deanu sátnejođiheadji ollásit čájehan go servodatdigáštallamis dadjá earáid oaiviliid jallodahkan.

Balto Henriksen dadjá ahte stuorra gielddain lassánivčče eretfárren ja geanehuhttašii sámi kultuvra, giela ja ealáhusaid. Mun lean hirpmástuvvan Balto Henriksena čuoččuhusas. Son lei oainnat ieš lahttun aiddo lohpahuvvon Guovllukommišuvnnas (Barlindhaugkommišuvnnas) ja evttohii ja bealuštii ahte stuorra regiovnnat nannešedje e.e sámi kultuvrra, giela ja ealáhusaid. Balto Henriksenii ii ge lean dat amas ahte Fiunnmárkku ovttastahttit stuorra regiovdnan ovttas Romssa Fylkkain. Balto Henriksenii ja kommišuvdnii ii ge lean amas ásahit Davvi-Norgga stuorra regiovdnan. Dat gal lea arvat stuorat go olles Sis-Finnmárku.

Sáhttá go Balto Henriksen čilget mo ja manin okta stuorra gielda geanahuhttá sámi kultuvrra, giela ja ealáhusaid, muhto omd. Finnmárku ja Romsa stuorra regiovdnan fas nanne sámi kultuvrra, giela ja ealáhusaid? Sáhttá go Balto Henriksen čilge mo stuorra regiovdna ii mielddisbuvtte eretfárrema, muhto stuorat gielda dan dagahivčče? Sáhttá go son leat dan dihte go Bargiidbellodat buorremuddui stivre Finnmárkku gileddain?  

Anán buorrin go Balto Henriksen almmolaččat ja válgagiččus čájeha eahpeluohttámuša gielddaide ja Bargiidbellodatsátnejođiheddjiide ja Bargiidbellodatfámuide gielddain. Mun oainnat anán árvvus njuolggalašvuođa.

NSR/SáB dáhttu nana gilážiid ja ealli sámi kultuvrra ja giela. Dađi bahábut lea Bargiidbellodat goaridan máŋggaid Deanu gilážiid ja dál lea Bargiidbellodat mannan badjel Sáttovári ja áigu goaridit ja billistit gránnjágieldda dan bokte ahte sirdit dehálaš ásahusaid Detnui. Det lea maid Bargiidbellodat gohččoda buorre guovllupolitihkkan. Lihkkus lea min čeahpes Elle R. Saba (Sámeálbmot Bellodat) muhtin muddui nákcen goazahit Barggidbellodaga guovddáštanáigumušaid. Muhto lea váttis go Bargiidbellodaga iežas olbmot galget gozihit.