Diibmá dieđihii Guolástus­departemeanta ahte sihtet 25 gilosaš olggos­fievrridaneriid bidjat, vai nogašii dát váttisvuođa. Dán jagi geassemánu gaskamuttus departemeanta dattege mearridii ahte eai áiggu bidjat eriid. Guolástus­ministtar Ludvigsena ágga lei ahte olggos­fievrridanearit fertejit gustot buohkaide, ii ge duollo­doaimmahagas leat vejolaš­vuohta váldit vuostá ja vurkkodit duoguštuvvon guliid. Mu mielas dát eai oro leamen albma ákkat. In ádde manne ii sáhte bidjat 25 gilosaš meari go lea sáhká guliid fievrrideames olggos riikkas. Ama 25 gilo lea eambbo go doarvái.

Ii oro leamen albma ágga ahte ii leat vejolaš vuostáiváldit ja vurkkodit duogoštuvvon guliid. Jos lea politihkalaš dáhttu, de lea buot vejolaš. Ludvigsen ii leat, mu dieđu mielde, mangeláhkái čilgen manne galggašii leat nu váttis. Galggašii njuolggadusaid ja dárkkistemiid ordnet vai galmmihan­bovssat bissot Duiskkas ja Holánddas.

Gielddaministtar Erna Solberg dajai NRK Nordnyttas borgemánu 2. b. ahte guolástus­turisttaide soaitá unohas go duollu sin dárkkista. Muhto, eat han mii suova riikii buktit sprihta, vaikko máŋggaid mielas duolludárkkisteapmi lea unohas. Eatnasat orrot leamen ovttaoaivilis dasa ahte turisttaid guolásteami ferte ráddjet, ja olggosfievrridaneriid bidjat  lea okta vuohki mot sáhttá ráddjegoahtit dan. Jáhkán eanas boahtti turisttat ipmirdit ahte ferte soapmásiid dárkkistit, vai galmmihanboksaguolásteddjiid nagoda bissehit.

Jos turismaguolásteapmi galgá leat guoddevaš, ja báikki olbmot dan dohkkehit, de ferte almaláhkái dan reguleret. Mátkeealáhus dadjá iešge ahte doarju reguleremiid. Dan berre mátkeealáhus čájehit, ja berre čilget Ludvigsenii ja Solbergii ahte lea sihke vejolaš ja govttolaš bidjat olggosfievrridan­eriid dál.

Váldde oktavuođa: Tor Mikalsen: tor@gronne.no Giehtatlf. 99326744