Márkomeannu lea reiden buori kulturfálaldaga ja Márkomeanus leamaš eambbo guossit go goassege ovdal. Hiehpá dalle gahčat EDS ságasolliin dán gažaldaga dál go gieldda- ja guovloministtar Erna Solberg lea boahtimin guossái borgemán 5. beaivvi;

- Lea go márkosámi kultuvra EDS dehálaš oassi man birra ságadoallit áigot ságastallat go ministtar boahtá guossái, gahčá NSR 1. evttohas Oarje-Romssas Ann-Mari Thomassen.

Lean medias lohkan ahte ságadoallit sihtet ságastallat 12 ášši ministtariin. Ii oktage dain 12 áššiin leat sámi ášši.

Ságadoallit sáhttet ságastallat Várdobáikki kulturhuotnaha birra

Bjørnar Pettersen (H), Dieldda suohkana ságadoalli, berre dovdat plánaid hukset Várdobáikki kulturhuotnaha danne go son ovdal lea leamaš mielde prošeaktajoavkkus. Jardar Jensen(H), Evenášši suohkana ságadoalli, lea dál Várdobáikki stivrras go IBSS-NSR dan evttohii, juste danne go ságadolliin leage njuolga oktavuohta fylkkasuohkana politihkkáriiguin ja nášunála politihkkáriiguin. Jos Várdobáikki kulturhuonas galgá šaddat duohtan, de heahttojit ságadoallit bidjat soames proseassaid johtui daid kanálaid bokte main sii besset váikkuhit.

Oarjin leat lihkostuvvan – ovttasbarggu bokte

Buvttán konkrehtalaš ovdamearkka: Samien Sitjie, oarjelsámi kulturguovddáš, lea 2006 stáhtabušeahtas vuoruhuvvon juste danne go Snoasa suohkan ja Oarje-Trøndelága fylkkasuohkan ovttas Samien Sitjieiin leat bargan vai stáhtalaš eiseváldit čuovvolit huksenášši stáhtabušeahta bokte.

Váilo politihkka ovttastahttima deaivvadanbáiki

Oarje-Romssas/Nuorta-Nordláttis leat stuorra guovllut main orrot ollu sámit. Sámit orrot suohkaniin, ja suohkaniin lea dieđosge maid ovddasvástádus sámi álbmogii. Dan áiggis go lean leamaš sámediggeáirras, de lean váillahan politihkalaš deaivvadanbáikkki mas sámepolitihkalaš ja suohkanpolitihkalaš dássi sáhtášedje deaivvadit ovttadássásaččat ságastallat ja ovttastahttit politihka dain áššiin mat gusket sámiide suohkaniin.

Buorre ovttastahttin nášunálalaš dásis, mihttomearri maiddái báikkálaš dásis

NSR barggai bures ovttas Olgešbellodaga stáhtaráđiiguin Finnmárkoláhkabarggus. Boahttevaš áššiin Olgešbellodat maid lea buorre ovttasbargoguoibmi. NSR oaidná dárbbu ovdánahttit suohkaniid ja Sámedikki ovttasbarggu dain áššiin mat gusket sámiide.

Ann-Mari Thomassen Tlf. 900 57 123