Guddnelis báhkojådediddje, ávvudalle, guosse!

Munji le stuorra ávvo liehket dánna sáme vuostasjbargge Henrik Kvandahl:a mujttomerkadahttijn. Sámedikke åvdås sidáv gijttet gå bivddiduvájma.

Gijjto didjij gudi lihpit ásadam dáv. Diedáv galggá viehka ållo hárdesvuohta dákkir merkadusáv ásadit gånnå mij lip uddni. Sij gudi li oajbbum vaj dát merkadibme Henrik Kvandahl:as duohtan sjaddá ælla ietjasij vuojto dahkam, ájnat dan ávo ja mihásvuoda diehti majt sij dåbddi dat baregos majt sån la dahkam viessomájgenis.

Henrik Kvandahl lij vuostasjbargge sámepolitihkalasj arenán. Sån lij rahtebargge ja åvddåmanne guhti sávret bargaj åvdedittjat sáme gielav ja kultuvrav dán bájken dakkár ájgen goassa ij lim gæhppat oadtjot ulmutjijt gulldalittjat sámij ássjij birra. Dakkár ájgen lij goassa dárojduhttem lij bahámus Vuonan. Mij diehtep dát politihkka le dahkam divogahtes vahágijt mijá álmmugij ja mijá kultuvrraj mijá lándan, ja ållagattjat dájn bájkijn.

Jus riekta, de ij la vargga jáhkedahtte mij vilá máhttep javllat sáme kultuvrra le rijbbam vájku dárojduhttem lij garras. Ij binnemusát la guddne dakkir vuostasjbarggijda degu Henrik Kvandahl. Dan diehti le dát biejvve aj gijttogisvuoda biejvve. Miján la sivva liehket gijttogisá dat bargos mij dagáduváj. Dát ásadus ja merkajdahttem Henrik Kvandahl:a birra le muv mielas tjáppa vuohke vuosedit vieledusáv ja rámpov suv bargos sáme ássjijt åvdedijn. Mån doajvov dát histåvrå ja vássám ájge merkajdahttem aj máhttá liehket vuodudahkan ja álggon ådåstuhtedum berustibmáj sáme iesjdåbdos, gielas, kultuvras ja sebrudakiellemis Bálágin. Mån lav læhkám siegen moatten sajen ietjama rijkan ådåstuhtedum berustime gáktuj sámij vidjurijs álmmugin. Agev álggá dat smájvvát muhtem sávres ulmutjijn, valla maŋŋenagi li ienebu ja ienebu vuosedam berustimev ja oassálassti.

Åvdebut gulájma sáme ássje lidjin ienemusát sebrudakåvddånime åvdån. Dálla le dat vuolusåjvij jårggålum guovdásj, nasjåvnålasj ja muhtem mærráj suohkana oajválattjajs, aktan stuorra åsijn rijka álmmugis. Uddni le sáme ássje juoga mij la positijvalasj mij ij tsakka látte ássjijt. Sáme kultuvrajn vuodudahkan åvddånahteduvvi sáme institusjåvnå måttijn barggosajijn. Ja mijá ådåájggásasj globála ájgen åhtsi aj sáme nuora fágalasj miellagiddis barggosajijda. Sáme giella ja kultuvrra ij tsakka máhttelisvuodajt oassálastátjit rijkkagasskasasj aktijvuodan, dat la ienni ávkken gå galggá dádjadit ietjá kultuvrajt ja sebrudagájt.

Mån ávvudaláv gulldalittjat dajt lågådallamijt ja åvddånbuktemijt majt ruvvaláhkáj galggap gullat Henrik Kvandahl:as ja suv bargos. Mån ávvudaláv oattjotjit ienebut oahpástuvátjit suv iellemijn ja daj maj sån ållij gå lij viesso. Ájnas la dåbddåt ietjas histåvråv, ja histåvrrå Henrik Kvandahl:as la oasse dat histåvrås massta mij gudi lip sáme galggap liehket mihá, dij gudi lihpit suv fuolkes ja suv maŋep buolva galggabihtit liehket oalle mihá dassta. Sån vuojnij åvddålij guovlluj ja vuosedij måvtugisvuodav gå anodij ássjev mav stuorsebrudahka ja ieneplåhko álmmugis ittjij ane manenik suv ájgen. Vuorbbe gå dat la ietjájduvvam uddni.

Maŋemusát sidáv sávvat vuorbev ásadusájn vijdábut uddni ja dajna bargujn mij la mijá åvdån, tjalmostahttet Henrik Kvandahl:av ja dav bargov gånnå sån li åvdemusán vaj sáme giella ja kultuvrra åvddån. Sávadav ja vuordáv dánna Bálágin boahtá guovdásj, vaj boahtte buolva oadtju diedojt ja oadtju oassálasstet Henrik Kvandahl:a ájnas bargos.

Gijtojt gå gulldalijda!