NSRs njunuševttohas Lulli-Romssas, Ann-Mari Thomassen oaivvilda ahte Norga ja Ruoŧŧa dakkaviđe berrejit joatkit ođđa boazoguohtunkonvenšuvnna šiehtadallamiid. "Lea Stáhtaid ovddastvástádus go bealit leat njunnálaga šaddan nu mo dál" Ann-Mari Thomassen dadjá. "Bealit berrejit dakkaviđe joatkit šiehtadallamiid, vai Norgga ja Ruoŧa Sámedikkit aktiivvalaččat besset searvat váttis dili čoavdit."
Sámedikkit fertejit aktiivvalaččat searvat Norgga ja Ruoŧa šiehtadallamiidda. Rájakeahtes boazodoallu lea čielga sámi ášši riikkarájain sorjakeahttá, ja danne lea mávssolaš ahte Norgga ja Ruoŧa Sámedikkit duođalaččat ja albmaláhkái besset searvat prosessii dán váttis dili čoavdit, masa rájahis boazodoallu Norggas ja Ruoŧas lea šaddan.
Šiehtadallagohtet fas!
Ferte várra lágalaččat čielggadit geas lea juridihkalaš vuoigatvuohta guohtuneatnamiidda, ja dat lea gal proseassa masa ferte geavahit dárbbašlaš áiggi. Boazodoallu guktot riikkain ánssašit ahte ovddavástideaddji bealit dál lagamus áiggi deaivvadit gávdnat čovdosa. Stáhtaidgaskasaš šiehtadallamat fertejit joatkit. Norgga ja Ruoŧa stáhtat fertejit ovddasvástádusa váldit dan dilis mii lea čuožžilan, ja fertejit guktot riikkaid Sámedikkiid váldit mielde prosessii dás ovddasguvlui.
Stáhtalaš ovddasvástádus
Dát lea váttis ášši. Rájáhis boazodoalus leat máŋga prinsihpalaš ášši maid ferte čuvget. Ii leat riekta čuoččuhit ahte “ruoŧa sámiid bohccot guođohit lobihemit Norggas”. Ruoŧabealde sámit leat leat geavahan guovllu dološ rájes ja sihtet dál geavahanvuoigatvuođa dološ geavaheami vuođul. Nuppe dáfus leat maid boazodoallit Norgga bealde, geaid stáhta lea suovvan sirdit ealuset dán guvlui danne go daddjui leat geavatkeahtes guovlun. Loahpaloahpas leat sámit guktot bealde raja šaddan stáhta politihka oaffarin, ja stáhta ferte váldit ovddasvástádusa dan dilis mii lea čuožžilan.
Lea oalle jáhkketmeahttun ahte Norgga vuohki čoavdit váttisvuođa lea joatkit geavahit 1972-boazoguohtunkonvenšuvnna, almmá jearakeahttá álgoálbmogiin dan birra maidege!
Oktavuođaolmmoš Ann-Mari Thomassen ann-mari.thomassen@same.net Giehtatlf. 90057123