Ulbmil lea oččodit eambbo olbmuid ja nannet gelbbolašvuođa oahpahus- ja mánáidgárdesuorggis sámi servodagas.

- Jus galgá nannet ja bisuhit sámegiela maid boahtteáiggis, de lea áibbas dárbbašlaš ahte gávdnojit doarvái sámegielat bargit skuvllain ja mánáidgárddiin. Sámediggi oaidná ahte váilot ollu sámegielat bargit geain lea pedagogalaš máhttu/ gelbbolašvuohta muhtun sámi skuvllain ja mánáidgárddiin. Dan dihte lea dehálaš ahte Sámediggi váikkuha dasa ahte loktet gelbbolašvuođa, ja stipeanda leage dehálaš movttiidahttingaskaoapmi, dadjá várrepresideanta Ragnhild Nystad (NSR).

Nystad oaivvilda ahte dál lea dehálaš oažžut eanet pedagogaid geain maid lea sámi giella- ja kulturgelbbolašvuohta, ja maid nannet sámegiela mánáidgárddiin, skuvllain ja obbalaččat sámi servodagas. Stipeanda almmuhuvvo geasi mielde.

- Stipeanda lea erenoamáš dehálaš go dál leat ráhkaduvvome ođđa oahppoplánat 13 – jagi skuvlii, ja mánáidgárdái. Dat maid váikkuhit dasa movt nannet sámegiela, dadjá Nystad loahpas.