- Dál ferte Davvi-Trøndalága allaskuvla váldit dán ovddasvástádusa duođas ja fállat dohkálaš oarjelsámegieloahpu nu go earáge giellaoahpahusaid fállet, dadjá NSR 2. evttohas oarjelsámebiires Ellinor Marita Jåma.

Davvi-Trøndelága allaskuvlla neahttasiidduin čuožžu ahte logi duhát ruvnnu šaddá máksit oahppodivvada jos áigu lohkat oarjelsámegiela. Ellinor Marita Jåma muitala ahte ii leat sihkár goas oahppofálaldat álget ja álget go obanassiige, danne go plánejuvvon kurssat eai álgge, dahje maŋiduvvojit, vaikko allaskuvllas lea ge oarjelsámegieloahpu našunála ovddasvástádus.

Gáibidit beare ollu oahppodivvada studeanttain

Jåma mielas ii dohkke gohčodit oarjelsámegieloahpu lassi- ja joatkkaoahppun vai skuvla beassá gáibidit eambbo oahppodivvada. Jurddaš; 10 000 ruvnnu máksit iežamet giela lohkat. Dát ii maŋgeláhkái dohkke, dadjá Jåma. Su mielas oarjelsámegiella ferte dohkkehuvvot sierra fágan man sáhttá váldit oassin bacheloroahpus, ja dasto sáhttit lohkat mastera ja doavttergráda. Ii galggašii leat dušše lassioahppun, nu mot dál lea. Dálá fálaldat ii dohkke, danne go leat beare unnán oahpaheaddjit skuvllas ja mearehis divrras oahppodivat, cealká Jåma. Go eai leat doarvái oahpaheaddjit, de kurssat eai leat guhkes áigái boahtán jotui dahje leat maŋiduvvon.

Sihtet lohkat oarjelsámegiela

Go ovdalgihtii ii dieđe álget go kurssat, ja go nu divrras lea, de dat ii leat buorre oarjelsámegillii mii lea jávkamin. Son muitala olbmuin livččii beroštupmi oahppat oarjelsámegiela.

- Dál ferte soamis váldit oarjelsámegieloahpu ovddasvástádusa. Jos Davvi-Trøndelága allaskuvla ii nagot váldit ovddasvástádusa, de berrejit beassat eret našunála ovddasvástádusas, cealká Ellinor Marita Jåma, Norgga Sámiid Riikkasearvvi 2. evttohas 12. válgabiires, oarjelsámebiires.

Oktavuođadieđut:

NSR 2. evttohas oarjelsámebiires, Ellinor Marita Jåma.

Tlf 916 13 460

Loga maid: http://www.namdalsavisa.no/Nyhet/article1638961.ece

Riikkastivrra siiddut

Ođđa válgadieđut