Norgga dutkanráđđi lea ráđđehusas ožžon bargun vuolggahit davviriikkalaš čielggadeami Norgga, Suoma ja Ruoŧa várás sámi dutkanlávdegotti birra.

Sámediggi áigu čuovvolit

- Dutkanráđi dovddahusat leat hui illudahttit. Sámediggi lea máŋga jagi bargan oččodit sámi dutkanráđi. Dál de viimmat orru ášši biddjojuvvomin áššelistui riikka dásis, lohká várrepresideanta Ragnhild L. Nystad.

Geassemánu 9. b. čoahkkimis gaskal Sámedikki ja Norgga dutkanráđi šiehtaduvvui lágidit dakkár konferánssa. Eará fáttát ledje jotkit Sámi dutkanprográmma ja St.dieđ. 30 (2004-2005) Dutkandáhtu.

- Sámediggi áigu čuovvolit Dutkanráđi dovddahusaid ja mis lea áigumuš doaibmat deaŧalaš váikkuheaddjin go sámi dutkanlávdegoddi hábmejuvvo, lohpida Nystad.

NSR hálida buotsámi dutkama

NSR presideantaevttohas Aili Keskitalo dadjá dát leat buorit signálat Dutkanráđis. - Mii dárbbašit dutkanstrategálaš orgána buoridan dihte vejolašvuođaid obbalaš sámi dutkamii. Dákkár orgána čanašii oktii politihkkálaš áigumušaid sámi dutkama ektui ja dutkanásahusaid, oaivilda Keskitalo. Son jáhkká ahte dákkár orgána movttidahtašii rájjiidrasttildeaddji ovttasbargui gaskal dutkanásahusaid main lea ovddasvástádus sámi dutkamii.

Sámegiella dutkangiellan

Aili Keskitalo oaidná dehálažžan nannet ja ovdánahttit sámegiela dutkangiellan. - Lea nu olu árbevirolaš máhttu vurkejuvvon gillii. Atnit sámegiela dutkangiella dagaha vejolažžan náitit dieđalašvuođa ja árvevirolaš máhttu, dadjá Keskitalo.

NSR áigu ge bargat dainna ahte vuođđuduvvo prográmma mii bistá logi jagi ja man ulbmilin lea ožžodit sámi dutkama, mas sámegileat dutkan vuoruhuvvo. Aili Keskitalo oaivil mielde dárbbašuvvo nannet sámegielat fágabirrasa Guovdageainnus, vai šattašii vejolaš ásahit sámi universitehta. - Sámi dutkanráđđi dagahivčče álkibun olahit dáid áigumušaid, lohká son.

Stádaid ovddasvástádus

NSR presideantevttohas deattuha ahte vaikko ásahuvvo ge sierra sámi dutkanráđđi, de lea dehálaš ahte stádat ain atnet muittus ahte dain lea ovddasvástádus sihkkarasttit sámi dutkama ovdáneami.