-  Eat dieđe doarvái dan birra mot guollešaddadanealáhus váikkuha riddo- ja vuotnaguolásteapmái. Dán suorggis galggašii dutkagoahtit, NSR sámediggeáirras ja Álttá/Fálesnuori 1. evttohas John Harald Skum cealká.

Beroštumit vuostálaga

Guollešaddadanealáhus lea Norgga stuoramus ealáhus, go fal mihtida eksportasisaboađu. Guliid šaddadit lagas riddo- ja vuotnaguovlluin main sámi guolásteaddjit leat bivdán dábálaččat ja árbevirolaččat. Ealáhusat šaddet dasto vuostálaga sihke mearraguovlluid geavaheamis ja birasváikkuhusgažaldagain mat čuožžilit vuonas.

- Mearrasámi guolásteaddjit dadjet olu váttisvuođaid čuožžilan sin ealáhusas guollešaddadeami geažil, John Harald Skum muitala. Guolásteaddjit čujuhit dasa ahte guolásteapmi lea nohkamin olu vuonain, eandalit dain vuonain main lea olu guollešaddadeapmi. Skum muitala ahte Álttás suohkanstivra dál lea bissehan buot ođđa guollešaddadanrustegiid huksema vuonas.

Negatiivva birasváikkuhusat

John Harald Skum muitala guollešaddadeapmi lasiha algešaddama/debbuid. Guollešaddadanvuonain lea maid vátnon guliid gođđin. – Dasto guollešaddadanealáhus váikkuha ja báidná mihá stuorit guovlluid go ovdal leat jáhkkán. Danne han dát báhkke ge báikki vuotnaguolásteddjiid vel dobbeliidda, Skum cealká.

- Makkár birasváikkuhusat guollešaddadanealáhusas oktiibuot leat, na dan eai leat doarvái bures čielggadan. Sii luitet dievva vuona biepmosálttiid, duvdet vuotnadorskki fávlliide, ja billistit gođđinguovlluid. Lea gal dutkojuvvon veaháš dan birra, ja dat dutkan goit čájeha ahte váikkuhusat sáhttet leat olu, dadjá John Harald Skum.

John Harald Skum gal bealistis oaidná ahte dát čuohcá árbevirolaš guolásteapmái mearrasámeguovlluin, ja dalle han dat čuohcá maiddái ássamii go goarida dan maid.

Galggašii mihá eambbo dutkat mot guollešaddadandoaimmat váikkuhit vuona ekovuogadahkii, Skum oaivvilda.

Ášši lea Sámediggeráđđái sáddejuvvon.

-----

Oktavuođaolmmoš:

John Harald Skum, tlf. nr. 41121529