Vuorrrástuhttá go mánáid fallehit vigihis valáštallanstoahkamiin

Retter ja Henriksen čujuheaba dasa ahte Várjjagis lea ealli ja nanus sámi servodagat. – Vuorrástuhttá go sámi mánáid fallehit rasisttalaš cielahemiid go leat spáppa čiekčamin. Go mánát leat valáštallandoaluin, de galggašii dát leat dakkár arena mas eai leat ovdagáttut, ii ge rasisma. Valáštallamis lea stuora ovddasvástádus vai buohkat besset ovdagáttuid haga searvat valáštallanstoahkamiidda, Gunn Britt Retter cealká, Várjjat sámeálbmot lihtu NSR/SàB sámediggeválgalisttu njunuš Várjjat válgabiires.

- Lean beahtahallan go dákkár rasisma gávdno Mátta-Várjjagis, Christina Henriksen cealká. – Ledjen jáhkkán ahte mii leat ollen dobbelii jagis 2005. Árjjalaš váhnemat ja sámi organisašuvnnat han leat buoridan sámi mánáid bajásšaddaneavttuid Mátta-Várjjagis maŋemus jagiid, Henriksen cealká. Son ii čiegat gal ahte ain gávdnojit heajus oainnut sámiid guovdu, - dakkáriid maid sáhttá gohčodit rasistalažžan. – Go mánát celket dákkáriid, de han mii diehtit ahte dat boahtá váhnemiin. Ferte ain buoridit bajásšaddandili ja bargat ovdagáttuid vuostá, Christina Henriksen nanne. Henriksen sáhttá šaddat vuosttaš sámediggeáirras Mátta-Várjjagis eret. Son lohpida Sámediggebarggu bokte buoridit mánáid- ja nuoraid bajásšaddaneavttuid.

Ollesolbmot maid cielahuvvet

Lea gullustuvvon ahte ollesolbmospábbačiekčit maid cielahuvvojit spábbačiekčamiin. Finnmárku spábbačiekčanbiire lohpidii dalle juo bargagoahtit dákkáriid vuostá. Ii ge dát bargu leat álo ruhtadoarjaga duohken, guokte njunnoža cealkiba. – Ollesolbmot fertejit leat ovddimusas rávvemin rasismma vuostá. Jos soamis cielaha mánáid, de berre lágideaddji su sihtat mannat eret, Retter ja Henriksen cealkiba.

Rasismma ii galgga goassege dohkkehit, guokte njunnoža cealkiba. Valáštallan ovdanáhtta mánáid friddjavuoiđa ja iešheanalisvuođa. Rasisma mii cielaha čearddalašvuođa billista ja deaddá. – Valáštallanjođiheaddjit Mátta-Várjjagis ja Finnmárkkus galggašeddje vuostálastit rasismma. Sáhtášii vaikkoba lágidit spábbačiekčama rasismma vuostá,  Gunn Britt Retter evttoha. Son muittuha ahte Mátta-Várjjat maid lea nuortasámi guovlu. – Nuortasámekultuvra lea erenoamáš, muhto dasa báhkkejuvvo juohke guovllus. Ferte doarjut nuortasámiid ja veahkehit nuortalaččaid servodaga ja kulturvrra ovdánahttit, Retter cealká.

Bissehednot rasismma!

Dál áiguba NSR/SáB njunuševttohasguovttos álggahit rasismavuostálastima. Moai ávžžuhetne buot listunjunnožiid, sihke Stuorradigge- ja sámediggeválgalisttuin dáppe Finnmárkkus, vuostálastit rasismma, Gunn Britt Retter ja Christina Henriksen ávžžuheaba.

NSR presideantaevttohas Aili Keskitalo (36) áigu vuosttamužžan vuolláičálit vuostálastinlisttu. – Dán ferte duođas váldit, presideantaevttohas cealká. – Rasismma ferte duođas váldit. Historjá lea midjiide dan čájehan.

--------------------------------------------------------------------------------------

Oktavuođadieđut

Várjjat Sámiálbmot Lihtu NSR/ SáB njunuševttohasguovttos Várjjagis:

Gunn Britt Retter, giehtatlf. 913 59 222 dahje 00 45 60 62 81 21

Christina Henriksen, giehtatlf. 97 64 19 90

Aili Keskitalo, NSR presideantaevttohas, giehtatlf. 950 72 743