Maŋŋel digáštallama sámeleavgga birra mánáidtogas, ja maŋŋel go lei lohkan Oslo sátnejođiheaddji cealkámuša Aftenpostenis ahte su mielas lea dehálaš ja buorre ahte čoahkkanit Norgga leavgga vuollai Norgga vuođđolágabeaivvi, sáddii NSRa 2. evttohas Lulli-Norggas rabas reivve Per Ditlev Simonsenii..

Symbolisere gullevašvuođa

Kirsti Guvsám oaivilda ahte lea buorre jurdda ahte miessemánu 17. beaivi galgá leat čohkkjeaddji beaivi buot Norgga ássiide. Guvsám imaštallá ahte lea go dat ahte gieldit muhtimiid atnimis iežaset kultuvra symbolaid čoahkkejeaddji. - Leavga lea identitehta. Leavga symbolisere gullevašvuođa. Ja dat ahte beasat čájehit gullevašvuođas, dat ahte beassat leahket danin manin lea našunalbeaivve oaivildan mun lea čohkkejeaddji, čállá Guvsám..

Bálddalaga Norgga leavggain

Kirsti Guvsám oaivilda ahte galgá levgejuvvot sámi leavggain almmolaš leavgastákkuin miessemánu 17. beaivvi. - Bálddalaga norgga leavggain, čállá son. Guvsám čujuha reivvestis ahte sámi leavga lea Norggas okta guovtti almmolaš leavggas, ja maid ahte sámegielat leat almmolaš gielat seamma dásis go dat guokte dárogiela. Guvsám muittuha reivvestis ahte eiseváldit leat duođašatan dan ahte Norgga stáda lea vuođđuduvvon guovtti álbmoga eatnamiid ala, sámiid ja dážaid. - Ii got de leat ártet ahte Norgga vuođđolágabeaivvi levgejuvvo dušše nuppi álbmoga leavggain, ii ge goappašiid, jearrá Guvsám reivves. Sutnje lea áibbas čielggas ahte leavggat leat ovttadássásažžat.

Cealkinfridjavuođas leat viiddis rájit

Guvsám čujuha maid sámeláhkii mas boahta ovdan ahte Sámediggi bidjá njuolggadusaid sámi leavgga geavaheapmái. - Ii got de leat nu ahte dušše Sámediggi sáhttá gieldit sámi leavgga geavaheami ja eai ge gieldda orgánat Oslos, jearrá Kirsti Guvsám reivves. Son muittuha ahte mánáidtoga Oslos eai leat privata doalut. Dat dáhpáhuvvo almmolašvuođas, ja doppe lea cealkinfridjavuođas viiddis rájit.  

Máŋggakultuvrrat oaivegávpot

Kirsti Guvsám oaivilda ahte Oslos lea erenomáš ovddasvástádus, go lea sihke dážaid ja sámiid oaivegávpot, ja berre danin leat ovdagovvan ja dohkkehit iešguđet álbmogiid vuoigatvuođaid ja ovttadássasašvuođa, dan bokte ahte levget sihke sámi ja norgga leavggain min oktasaš nášunalbeaivvi. - Dušše dáinna lágiin šattašii miessemánu 17. beaivi čohkkejeaddji beaivin, loahpaha Kirsti Guvsám.

Loga olles reivve dás