NSR jođiheaddji Aili Keskitalo dajai sárdnistis ahte viimmat gudnejahttit daid nissoniid geat 1981:as ledje measta jándora stádaministar Gro Harlem Brundtlanda kántuvrras. - Leat olu jagit vássán dáhpáhusa rájes, ja máŋggas sis leat jo eret vádjolan. Mun lean lihkká hui ilus dainna ahte Máze sámiid Searvi evttohii ahte NSR galgá gudnejahttit dáid nissoniid, dajai NSR jođiheaddji sárdnistis. 

"Samene har rett, stå på"  

1981: Iđđes, beaivvi alde mii maŋŋel šattai sámi álbmotbeaivi, deaivvadedje 15 sámenissona stádaministáriin su kántuvrras. Nissonat oaivildedje ahte eai lean beassan muitalit oaivildeaset, ja go stádaministar guđii čoahkkima diibmobeale maŋŋel de sii báhce čohkkat. Ja sii vurde das, gitta dassažii go bolesat sin vižže olggos nuppe iđida.

Ellen Kristina Saba, guhte lei viđa  jahkásaš 1981:as, muitalii NSR riikkačoahkkimii ahte nissonat dovde iežaset beahtahallan, ja dan dihte eai vuollánan guođđit stádaministara kántuvrra ovddal go áššiid ledje čielggadan stáhtaministarin. Saba muitalii ahte Elle Máret Gaup Dunfjeld rohkkii, sin ságadoalli, almmuhii mediaide ahte nissonat eai boađe guođđit kántuvra, ja jus sin galget sirdit de fertejit politiját fámuin sirdit sin, vaikko guoddit sin eara sadjái. - Nu mii buriin oamedovdduin čohkohalaimet kántuvrras, ja navddašeimmet dan stuorra olmmošálbmoga mii čoahkkanii dasa olggobeallai, ja čurvo "Samene har rett, stå på", muitalii Saba Riikkačoahkkima sárdnestuolus ovttas Inger Anne Sara Gaupain. Ellen Kristina Saba muitalii mo politijáfámut bággehedje nissoniid olggos kántuvrras ráđđehusviesu geallárii, mo bálkestedje sin politibiillaide ja dolvo Oslo politivissui.

Dán dáhpáhusa maŋŋel jotke oassi nisson-joavkkus dovddusin dahkat sámi vuoigatvuohtarahčamušaid riikkaidgaskasaččat, mátkoštedje Romai Pava lusa ja ON:ii New Yorkii.

Ii álkis mearrádus nissoniidda

Aili Keskitalo dajai sárdnistis ahte dát gudnejahttin maid lea liiba oainnusin dahkat buot daid bargguid maid sámenissonat leat buolvvaid čađa bargan sámi organiserema ja sámi vuoigatvuođaid ektui, Else Laula Renberg rájes gitta otnážii. - Mii fertet atnit muittus ahte ii lean álkes mearrádus dáid nissonolbmuide, dáid eatneolbmuide, guođđit bearrášiid ja searvát ákšuvdnii mii lei sámi servodahkii hui amas dalle, muittuhii Aili Keskitalo sárdnistis. 

Keskitalo čujuhii dasa ahte NSR bargá otne dihtomielalaččat dan ovddas ahte sámi nissoniid jietna galgá gullot sámepolitihkas dál maid. - Okta dáin nissoniin lei unna nieiddaš go dát dáhpáhuvvai, ja lean hui ilus oaidnit ahte son lea šaddan aktiivalaš sámepolitihkkárin - muhto ii leat nu ártet go sus lea dákkár vásáhus, dajai Aili Keskitalo sárdnistis.

"Oaivugasat"

NSR-Nuoraidlávdegotti jođiheaddji Káre-Elle Partapuoli, giitii NSR bealis dan barggu ovddas maid nissonat leat bargan. - Galgabehttet čevllohallat din ja din etniid, eamidii ja oappaid daguid, dajai Partapuoli.

Máze Sámiid Searvvi jođiheaddji Ánne Márjá Gaup Eira geigii nissoniidda skeaŋka maid Trygve Lund Guttormsen lea ráhkadan sidjiide. Govva ráhkaduvvoi dán gudnejahttimii, ja Guttormsen lea gohčodan gova "Oaivugasat".

Ellen Kristina Saba giittii nissoniid bealis go NSR viimmat gudnejahttii nissoniid. - Mii nissonat hálidat maid giitit veahkis ja doarjagis maid oaččuimet stuorra sámepolitihkkáriin gullevaččat NSRii, ja maiddái earáin, lohapahii Saba.