- Mii leat hui ilus go leat nagodan oažžut posišuvnna ja Olgešbellodaga bušeahttasoabaheapmái, mat dál dorjot min evttohusa juolludit eambbo doaibmadoarjaga giellaguovddážiidda, lohká NSR parlamentáralaš jođiheaddji ja presideantaevttohas Aili Keskitalo.

Maŋŋel Sámedikki reviderejuvvon bušeahta lávdegoddemeannudeami lea dahkkojuvvon bušeahttasoabaheapmi gos earret eará giellaguovddážat leat stuorámus vuoitit go ožžot lassi juolludemiid oktiibuot 2 milliuvnna ovddas. Nu go dál lea evttohuvvon, de oažžu guhtege giellaguovddáš 150 000 ruvnno lassi doaibmadoarjaga.

- Dát lea illubeaivi sámepolitihkas. Viimmat leat ožžon doarjaga dasa ahte giellaguovddážat galget oažžut lassi doaibmadoarjaga. Dán ovddas mii leat guhká bargan, ja maŋemustá 2012 skábmamánu bušeahttagieđahallamis. Dalle eat ožžon doarjaga, ja danne lea ge erenoamáš illudahtti go dál leat nagodan dan, lohká hui duhtavaš presideantaevttohas.

Son čujuha dasa ahte giellaguovddážat leat leamaš dehálaš áššin NSR:ii čađat áigge. – Leimmet mii geat álgoálggos oaččuimet giellaguovddážiid mielde bušehttii, ja buot bohtosat maid sii olahit duođaštit ahte lei rievttes vuoruheapmi dalle. Dál mii nannet fas giellabarggu buot sámi guovlluin, loahpaha Keskitalo.