NSR Trond Are Anti lea lohkan Sámediggeráđi ođđa kulturdieđáhusa, ja oaivvilda ahte lohpádus kulturpolitihka ođđa bálgáid birra lea lohpidit menddo ollu.
- Dán dieđáhusas ii leat ii mihkkige ođas. Mii oaidnit ahte Sámediggeráđđi hálida stivret kulturásahusaid, seammás go sis leat várrogas cealkagat gos daddjo ahte dáiddáriin galgá leat friddjavuohta nu guhká go diktet iežaset stivrejuvvot dan guvlui maid Sámediggi mearrida, dadjá Anti.
- Mu mielas orru ahte Sámediggi dahká smávva rievdadusaid ja gohčoda dan áibbas ođđa kulturpolitihkkan. Oaivvildan ahte dat lea dájuhit sihke jienasteddjiid ja kulturbargiid, joatká Anti.
Son oaivvilda ahte lea issoras mearka ahte Sámediggeráđđi hálida stivret kulturinásahusaid - Mii oaivvildat ahte lea boastut stivret mo festiválat ja kulturviesut galget geavahit iežaset ruđaid. Sámi kultuvra lea demokráhtalaš kultuvra mas leat ollu oasálaččat, ja midjiide gánnáha ahte báikkálaš oasálaččat ieža besset árvvoštallat mo ruđat galget geavahuvvot, loahpaha Anti.
Kommenter denne artikkelen