Sámedikki dievasčoahkkimis geigejedje nuorat Gearretnjárgga siiddas reive oljo- ja energiijaministarii Ola Borten Moe:i. Sii leat sakka fuolastuvvon boahtteáiggi ektui boazodoallin jus Fálesrášša bieggafápmodoaimmahat Fálesnuori suohkanis duohtan dahkku. Aurora vindkraftverk lea ožžon doaibmalobi álggahit barggu.

- NSR bealis mii doarjut dáid nuoraid. Mii maid ballat váikkuhusain maid huksen sáhttá mielddisbuktit, ja mii maid vuordit nu go sii ahte plánat bissehuvvojit.  Dan dadjá Aili Keskitalo guhte lea Norgga Sámiid Riikasearvvi (NSR) jođiheaddji ja presideantaevttohas.

Keskitalo čujuha erenoamážit dasa ahte ministtar lohpidii sártnistis Sámedikkis ahte sisabahkkemiidda mat dagahit "alla riidodási" eai galgga addojuvvot doaibmalobit.

- Jus dát ii leat sisabahkken mas lea alla riidodássi, de imaštalan goas lea alla riidodássi. Mun vuorddán ahte ministtar čuovvula dan man son dál lea dadjan Gearretnjárgga bieggafápmodoaimmahaga ášši oktavuođas, dadjá Keskitalo.