- NSR riikastivra lea hui duhtavaš dainna mo NRK Sápmi dál čalmmustahttá sámegiela sin ođassiidduin neahtas. Mii leat erenoamážit ilus go oaidnit ođasáššiid neahttasiiddus sihke lulli- ja julevsámegillii, lassin davvisámegillii. Mii jáhkkit ahte dát váikkuha ahte sápmelaččaid gaskkas šaddá eanet dihtomielalašvuohta sámegiela máŋggabealatvuođa hárrái, ja ahte dat movttiidahttá sin guđet geavahit dahje hálidit oahppat lulli- ja julevsámegiela, čilge NSR jođiheaddji ja presideantaevttohas Aili Keskitalo.

NSR lea maid bidjan merkii ođđa Mánáid-tv-ráiddu mii lea julevsámegillii, Biri Biernna, ja oaivvilda ahte dat lea dehálaš julevsámi mánáide. Sámi mánáid árgabeaivvis leat ollu mediafálaldagat dárogillii ja eará gielaide. Gullat sámegiela geavahuvvot tv:s váikkuha mánáid giellaovdáneapmái ja nanne giela stáhtusa. Dát lea erenoamáš dehálaš mánáide geain eai leat nu galle giellaarena olggobealde ruovttu dahje skuvlla/mánáidgárddi. NSR riikkastivra illuda dassá Mánáid-tv sáddagat lassánit nu go lea plánejuvvon, ja sávvá ahte dat maiddá sisttisdoallá ahte fálaldagat julevsámi ja lullisámi mánáide vuoruhuvvojit.

- Mii leat dattege behtohallan go ii leat vel boahtán čoavddus dasa ahte julev- ja lullisámegielat radiosáddagat eai leat fidnemis neahtas dahje podkastan maŋŋá sáddaga. Dá lea guhká leamaš váttisvuohta, ja mii vuordit ahte NRK Sápmi gávdná vuogas čovdosa dása, loahpaha Keskitalo.