- Giellaguovddážat leat min beaktileamos giellaprošeavttat, danne fertet mii daid nannosit nannet. Mii evttohat eanet ruđaid giellaguovddážiidda mat jo gávdnojit, ja mii hálidat ásahit eanet guovddážiid. Dá lea čielga vuoruheapmi NSR alternatiiva bušeahtas Sámediggái, dadjá sámediggeáirras Ann-Mari Thomassen.

NSR alternatiiva bušeahtas evttohuvvo lasihit 3,6 milliuvnna giellaguovddážiidda. Evttohuvvo measta 200 000 juohke giellaguovddážii, nu ahte juohke giellaguovddáš oažžu 800 000 njuolgga doarjjan.

- Giellaguovddážat dárbbašit njuolga doaibmadoarjagiid nu ahte sii sihkkarat dihtet makkár giellaprošeavttaid sii sáhttet álggahit. Sii leat čájehan ahte sii doaimmahit áššiid, ja danne ferte sin nannet. Mii evttohat 2013 bušeahtas nannet dan buori barggu lasihuvvon juolludemiiguin, dadjá Thomassen.

Alternatiiva bušeahtas evttoha NSR maiddá ahte 1 milliuvdna báhcá strategalaš giellaguovddášprográmmii, mii galgá sáhttit geavahuvvot ásahit eanet giellaguovddážiid. 

- Ulbmil lea ahte šaddet eanet giellaguovddážat. Modealla doaibmá nu bures ahte eanet guovlluide galgá sullasaš fálaldat sáhttit boahtit buorrin, loahpaha Thomassen.