Son oaivvilda ahte máŋggaid ráđđehusaid politihkkarat leat leamaš searvvis dagahit nu ahte riddogátti ássit leat massán iežaset vuoigatvuođaid ja olaheami guollái. Røkke-feastonuohttefatnasat eai buvtte guoli gosa leat geatnegahtton. – Sii leat leamaš searvvis dagahit ahte čuovggat jáddaduvvojit ja olbmot guđđet rittu, seammás go boahtá ovdan ahte Røkke lea tinen 600 milliuvnna feastanuohttefatnasiiguin, dadjá Keskitalo. – Mii fertet muitit ahte go geahččat rusttegiid ja feastonuohttefanaskonsešuvnnaid oktan, nu go álgo álggus lei oaivvilduvvon, de báhcá Røkkii badjel 100 milliuvnna tienasin jahkásaččat nu go prográmmas boahtá ovdan. 

– Váttisvuohta lea ahte dál čohkkejuvvot guolleearit moatti olbmo gieđaid gaskii. Go olbmuin nu go Kjell Inge Røkkes leat 24.500 tonna guolleearit, ja riddofatnasiid oastimat, de šaddá dát menddo stuorra fápmoposišuvdna guolleealáhusas. Brennpunktprográmmas boahtá čielgasit ovdan ahte Røkke hálida iežas tietnasa guolásteamis lasihit nu ollu go vejolaš, seammás go ássiin rittus geain leat vuoigatvuođat guollái galgá leat nu unnán árvoháhkan guolis go vejolaš, dadjá Keskitalo guhte oaidná ahte ovddasvástideaddji politihkkarat gáhtet, ja muittuha ahte dát lea leamaš politihkkariid dáhttu guhkit áiggi.

– Røkke ferte oažžut johtui buvttadeami rusttegiin, ja dat fertejit sihkkarastot birra jagi doaimma dan bokte ahte feastonuohttefatnasat buktet guoli rusttegiidda, áinnas dan haddái maid dat duođas máksá. Jus dát ii dáhpáhuva de fertejit guolleearit váldot ruovttuluotta. Dasa lassin ferte čavget buktingeatnegasvuođaid, gáddi ja mearra ferte rehkenastot oktan. Ná šaddet rusttegat gáttis hui gánnáhahttin ja olbmuide rittus addá guolli mii vuodjá stohpouvssa olggobealde stuorát sálažiid, dadjá Keskitalo.

Riddoguolástuslávdegotti evttohusa meannudeami oktavuođas lei láhččojuvvon riddoguovllu ássiid vuoigatvuođaid dohkkeheapmái, muhto dan badjelgeahčai sihke ráđđehus ja Sámediggepresideanta Egil Olli, guhte mieđai bilideaddji soabadeapmái, Keskitalo mielas.

– Midjiide ii leat doarvái rahčat dan ovdii ahte lea vejolašvuohta čálahiid čuohppat, mii fertet rahčat viidásat vai riggodagat gullet ássiide rittus, loahpaha NSR presideantaevttohas.

----------

På norsk / darogillii