Juoiganbusse vuolgá Kárášjogas duorastaga geassemánu 21. beaivvi ja olle árbevirolaš lullisámi mihcamárávvudeapmái Åanghkerenjeeruvii bearjadaga geassemánu 22. beaivvi. Busse jorggiha sotnabeaivvi geassemánu 24. beaivvi maŋŋel go oasseváldit leat beassan vásihit maiddái dán dovddus lullisámefeastta.

Ulbmil bussemátkkiin lea ahte oasseváldit galget oahpásnuvvat iešguđet guovlluid juoiganárbevieruiguin. Mis leat fárus čeahpes juoiganbagadallit geat oahpahit midjiide luđiid dain guovlluin maid meaddel vuodjit.

NSR-N lágidii juoiganbussemátkki vuosttaš geardde 2010:s, ja dieđut oasseváldiin dalle ledje nu buorit ahte nuoraidlávdegoddi lea mearridan ođđasit lágidit dán bivnnut mátkki:

Vuodjinruktu ja áiggit sullii:

Kárášjohka: 11:00

Guovdageaidnu: 13:00

Gárgán: 18:00

Evenášši: 21:00-22:00 (bisáneapmi eahketbiepmuin)

Lodegat: 23:00

Bognássje: 00:00

Divttasvuotna: 00:30

Fuoisku: 03:00

Mussir: 07:00

Maajehjaevrie: 11:00-13:00 (bisáneapmi iđitbiepmuin)

Åanghkerenjeeruve: 14:00

Sii geat eai oro vuodjinruvttu lahka, ožžot nu guhkás go vejolaš fállun molssaevttolaš sáhtu dakkár báikái man meaddel busse vuodjá. Oasseváldit lulde ožžot gokčojuvvot girdibileahtaid davás.

Ahkemearri oassálastit lea 18 jagi. Oassálastindivat lea 100 ruvnno miellahtuide, 250 ruvnno sidjiide geat eai leat miellahtut.

Juoiganbusse lea gárrenmirkkohis lágideapmi.

Sáhtát dieđihit iežat mielde epoastta bokte čujuhussii nsr-u@nsr.no.  Jus don it leat miellahttu NSR:s, muhto háliidat šaddat miellahttu, de sáhtát maid váldit oktavuođa nsr-u@nsr.no-čujuhusa bokte. Geahča maid Facebookdáhpáhusa. 

Váldde maid oktavuođa jus háliidat eambbo dieđuid!

Dieđihanáigemearri: geassemánu 8. beaivvi.

--------

På norsk / dárugillii