Stuorradikki ealáhuslávdegoddi meannuda PROP 70 L (2011–2012) mii lea láhkarievdadusaid birra mat gusket mearrasámi guolástusaide.  Lávdegoddi buktá ovdan iežas evttohusa miessemánu 30. b. ja ášši meannuduvvo Stuorradikkis geassemánu 4. b.

– Lea ain gižžu rittus eriid ektui gaskal gaskal stuorra guollefatnasiid ja unnit fatnasiid/šárkkaid, rikkes vuotnaservodagaid ja báikkiid main leat unnán earit, bargosajiid mat leat guhkkin ábis ja bargosajiid ektui mat leat gáttis guollebuvttadeami oktavuođas. Stuorradiggi berre oahpásnuvvat iešguđetge guolástusáššiide main lea mearkkašupmi mearrasámi ássamii, oaivvilda Randi A. Skum.

Finnmárkulágaproseassa oktavuođas lei ovttaoaivilvuohta gaskal Sámedikki ja Justiisalávdegotti ahte gávdnojit mearrasámi vuoigatvuođat. Čielggadan dihte hivvodaga dáin vuoigatvuođain diŋgui Stuorradiggi guorahallama sápmelaččaid ja earáid vuoigatvuođaid birra guolásteapmái ábis olggobealde Finnmárkku. Stuorradikki diŋgojupmi dagahii ahte Riddoguolástuslávdegoddi ásahuvvui, das leat riikka čeahpimusat fágasurggiin jussa ja guolásteapmi ja lea dr. juris Carsten Smith guhte jođiha lávdegotti.

– Stuorradikki ealáhuslávdegoddi berre jearrat manne Guolástus- ja riddodepartemeanta lea badjelgeahččan ahte Stuorradiggi ovdal lea mieđihan sápmelaččaid ja riddoássiid historjjálaš geavaheami ábis. – Ii sáhte leat nu ahte Stuorradiggi hálida ahte Guolástus- ja riddodepartemeanta stivre guolástusáššiid dan guvlui maid ieš dáhttu beroškeahttá daid politihkalaš fievrridemiid maid Stuorradiggi ieš lea bidjan, dadjá Randi A. Skum.

Stuorradikkis lea erenoamáš vejolašvuohta divvut dološ vearrivuođaid mat leat dahkkojuvvon mearrasápmelaččaid ektui vuonain ja riddogáttiin máŋggaid jagiid badjel. Oažžun dihte govvádusa das mo dát lea váikkuhan mearrasámi servodagaide, berre ealáhuslávdegoddi vuolgit davás galledit muhttin dáin riddobáikkiid maidda dát lea váikkuhan oassin nannen dihte vuođu iežaset áššemeannudeapmái, loahpaha Skum.

----------

På norsk / darogilli