Odne, njukčamánu 8.beaivvi, ávvudit mii gaskariikkalaš nissonbeaivvi. Nissonbeaivi lea leamaš beaivi gos muitit rahčamušaid dásseárvvu ja nissonáššiid dihte. Bargu nissoniid vuoigatvuođaid ja sámi vuoigatvuođaid dihte lea huksejuvvon seamma vuođđojurdagis: dásseárvu ii atte álohii seammaláganvuođa, ja solidaritehta lea dehálaš.

Dásseárvohástalusat dálá dáčča ja sámi servvodagas lea váddásut fáhttet go dalle go nissonbeaivi ásahuvvui. Dat ii mearkkaš ahte ii gávdno, ja iige mearkkaš ahte ii gáibiduvvo servvodatáŋgirvuohta ja politihkalaš váikkuhangaskaoamit sihkkárastindihte dásseárvvu. Muhtin beliin min servvodagas, nugo dáčča ealáhusas, lea ovdamearkadihti vátni bajimušhoavddaid gaskkas mat leat nissonat. Servvodatdigaštallan lea lihkká rievdan, ja otne ii leat dušše nissoniid vuoigatvuođaid ja vejolašvuođaid birra sáhka, muhto maiddái dievdoolbmuid vuoigatvuođaid ja geatnegasvuođaid birra nugo bearášpolitihkkas. Sámi servvodagas várra oaidnit ahte stuorámus erohusat sohkabeliid gaskas lea čatnon skuvlejupmái ja virgegullevašvuhtii. Mielddisbuktá go dat váikkuhusaid min báikkálaš servvodagaide? Dan birra diehtit menddo unnán otne.

Nissonbeaivi lea gaskariikkalaš solidaritehtabeaivi, ja eará osiin máilmmis lea mihá álkibut oaidnit eahpevuoiggalašvuođa mii guoskká fámuid ja árvvuid juolludeami sohkabeliid gaskas. Nissonolbmot dahkket otne stuorámus oassi barggu máilmmis, muhto sii eai oamas eanet go 1 proseantta máilmmi riggodagaid. Nissonolbmuid vuoigatvuođat, vejolašvuođat ja friddjavuohta lea garrasit gáržžiduvvon ollu osiin máilmmis. Stuorámus eaŋkilhástalus lea áin veahkaválddálašvuohta nissonolbmuid ja mánáid vuosttá, ja erenoamážiid lea veahkaváldin soahtedoaimmaid oktavuođain maid mii diehtit gevvet nissoniid vuosttá, muhto mii čuohcá sin bearrašiidda ja báikkálaš servvodahkii. Eat ábut vajálduhttit dan nissonbeaivvi!