Mii oaidnit ahte ruhttájuohkin čavgejuvvo, ja NSR lea dál ráhkaneame ráhččat oaččundihte mearrasámiid vuoigatvuođaid, dadjá Gunn-Britt Retter, Norgga Sámiid Riikasearvvi (NSR) sámedikkeáirras. – Go Norgga eiseválddit eai hálit addit makkárge gádjunreaidduid mearrasápmelaččaide fertet oaččut dán eará kanálaid čađa.

Riddoguolástus lávdegoddi šaddá gahččat stuoradikkemeannudeami vuolde, einnosta Retter, - Eai makkárge mearkat čájet ahte meannudeapmi Stuoradikkis šaddá mihkkege eará go dat maid ráđđehus oaivvilda. Retter dadjá ahte NSR siđuha stuorat ráhččamuša Sámedikki bealis. – NSR evttoha bidjat mearkkašahtti submii mii atno ráhkkaneapmái rievttalaš čielggadeapmái mearrasámi vuoigatvuođaide, sihke našunála ja gaskkariikkalaš riektevuogádagain.

NSR-jođiheaddji Aili Keskitalo duođašta ahte NSR bušeahttaevttohusas 2012 leat evttohan bidjat 15 millijovnna rievttálaš čielggademiide mearrasámiid vuoigatvuođaide.

Ruđat galget geavahuvvot alliansehuksemii sihke riekte-eaiggádeddjiide ja/dahje sin organisašuvnnaide, čielggadeapmi dasa geat galget cegget riektegáibádusa ja juridihkalaš, ekonomalaš ja praktihkalaš veahki dassážii leat geahččalan daid rievttalaš vejolašvuođaid mat gávdnojit, čilge Keskitalo.

Mii leat ráhččan mearrasámiid vuoigatvuođaid ovddas sihke Norgga Sámiid Riikasearvvi ásaheami rájes ja maŋŋel Sámedikkis. Ráhččan lea čavgejuvvon ja lea eará arenain go doppe gos dat sii geasa dát gullá leat. NSR lei sávvan ahte ráđđehus Bargiidbellodagain njunnošis galggái dohkkehit min historjjálaš vuoigatvuođaid. Go nu ii geava dalle fertet mii ipmirdit ahte fertet ráhččat maŋemuš minuvttás earáid vuođuid vuolde. Dát lea mearka ahte eat jurddaš vuollánit nu jođánit, loahpaheaba Keskitalo ja Retter.

På norsk/Dárogillii