Dálátjij le Ájluovta skåvlåjn læhkám åvdåsvásstádus julevsáme guhkásåhpadimev fállat  vuodoskåvllåoahppijda Vuonan.  Sjerma baktu li 11 oahppe iednegiellaåhpadimev oadtjum rijkav miehtáj. Valla dálla gáhtu dát fálaldahka danen gå Divtasvuona suohkan ij la vuorbástuvvam virggáj biedjat åhpadiddjijt gudi máhtti mánájt åhpadit.

Sámedikkeájrrasa Ann-Mari Thomassen ja Miriam Paulsen æbá la dudálattja:

- UNESOC milta le julevsámegiella ájteduvvam giella.  Le ájnas máná gudi sihti åhpadimev julevsámegiellaj oadtju dav fálaldagáv, javllá NSRa Sámediggeájras Miriam Paulsen.

Dán vahko sámedikkeájrrasa oassálassteba julevsáme åhpadimkonferánsan Bådåddjon. Såj gåhttjoba Sámedikkerádev  guládallat Nordlánda Fylkkamánnijn gåktu máhttá guhkásåhpadimev julevsámegiellaj vuodoskåvlån jåhtuj oadtjot, vaj láhkamierredum riektá åhpadibmáj ålliduvvá.

- Tjoavdos máhttá liehket buorep bálkká- ja barggosjiehtadusájt julevsáme iednegiellaåhpadiddjijda fállat, ja duodden guláskuddat sáme institusjåvnåj ma fálli julevsáme åhpadimev Vuonan ja Svierigin jus siján le vejulasjvuohta åhpadimev hihkalit, javllá NSRa Sámediggeájras Ann-Mari Thomassen.

Aktijvuohta:

Miriam Paulsen, 97617377

Ann- Mari Thomassen, 90057123

Sámediggeájrrasa

Vuona Sáme Rijkasiebrre (NSR)

-----------------

På norsk / Dárogiellaj