-NSR- ja NSR/SáB sámediggejoavku evttohii ođđa ášši Sámedikkis golggotmánu mii guoská sámegieloahpahussii olggobealde sámegiela hálddašanguovlluid, dadjá NSR/SáB sámediggeáirras Trond Are Anti.

Kártenbárgu dehalaš

Anti čilge ahte lea dárbu kártet ožžot go buot sámi vuođđoskuvllaoahppit olggobealde sámi hálddašanguovlluid oahpahus fálaldaga sámegielfágas. Lea maid dárbu kártet ožžot go sámi oahppit ja sin váhnemat olggobealde hálddašanguovlluid diehtojuohkima ahte ohppiin lea vuoigatvuohta oažžut oahpahusa sámegielfágas. - Jos skuvllat eai nagot fállat oahpahusa sámegielfágas sin oahpaheddjiin, de Departemeanta sáhttá dohkkehit molssaeavttu oahpahushámiide nugo gáiddusoahpahusa.

Anti čujuha ahte oahpahuslága § 6-2 lea sámi vuođđoskuvlla ohppiin olggobealde sámegiela hálddašanguovlluid vuoigatvuohta oažžut oahpahusa sámegielfágas. Oahpahusláhka cealká viidásat ahte Departemeanta sáhttá addit njuolggadusaid molssaeavttu oahpahushámiide go dákkár oahpahus eai sáhte fállát iežaset skuvlla oahpahusbargiin.

Leatgo váilevašvuođat

-Dát kárten galgá leat vuođđun diehtit lea go váilevašvuođat sámegielfága oahpahusas olggobealde sámi hálddašanguovlluid. Jos leat váilevašvuođat, de galgá dát kárten leat vuođđun makkár doaibmabijuid bidjat johtui deavdit Oahpahuslága vuoigatvuođa ahte buot sámi vuođđoskuvlla oahppit olggobealde sámi hálddašanguovlluin galget oažžot oahpahusa sámegielfágas, dajai Trond Are Anti Sámedikkis.

Gulahallanolmmoš: NSR/SáB Nuortaguovllu válgabiire Trond Are Anti, mob.nr. 40045518

----------

På norsk / Dárogillii