Sámedikkeáirras ja boazodoalli Áilen-Niga Máhtte, Mathis Nilsen Eira, (NSR) oaivvilda Sámediggi galgá hilgut šiehtadusa gaskal Sámedikkeráđi ja Ráđđehusa mii ii dohkket mearrasámiid ja vuonnaálbmoga historjjálaš rievtti guolleriggodagaide. Áilen-Niga Máhtte lea mannan váhkku oassalasten Sámedikki Kultuvrra- ja ealáhuslávdegotti gieđahallama dán áššis. Lávdegotti unnitlohkku evttoha hilgut šiehtadusa.

- Ealáhusdoallin gáržžes ealáhusas dieđan man deaŧalaš lea čájehit oktigullevašvuođa, dadja Áilen-Niga Máhtte. – Mu vásahus lea ahte riektegážaldagat leat deaŧalaččat sihkarastindihte boahtteáiggi álgoálbmotealáhusaide.

Áilen-Niga Máhtte lea čuvvon boazodoalo ovdáneami masá ovtta buolvva, sihke boazodoallin ja áktiivvalaš ealáhuspolitihkkárin.

- Boazodoalloriekti lea ovdánan rievtteáššiid bokte, muhto maiddái guorahallamiid ja politihkkalaš proseassaid bokte. Lea leamaš ádjás bargu, lasiha Áilen-Niga Máhtte. – Lea áigi ahte mearrasápmelaččaid ja vuonnaálbmoga geavaheapmi dohkkehuvvo sihke historjjálaš riektin ja riekti boahtteáiggis, loahpaha Áilen-Niga Máhtte, Mathis Nilsen Eira.

---------

På norsk / Dárogillii