–      Mis lea leamaš issoras buorre ovdáneabmi 2010is mii guoska miellahtulohkui, dadja Skum. Jođiheaddjis lea buorre árta lea duhtaváš, go miellahttulohku lea  duppalasten maŋŋemus jagi. – Mii manaimet 40 miellahtus 2009is gitta 110 miellahttui 2010is, dadja Skum, gii jođiha stuorámus NSRa báikkálaš searvvi.

–      Mun lean fuomašan ahte lea eanet beroštubmi sámi áššiidde Alttas, dadja Skum, gii jahkka ahte olu searvvi doaimmat báikkálaččat lea dagahan ahte leat eambbo miellahtut. – Stivra lea bargan olu ovdánahtindihte ođđa fálaldagaid. Lávvordatkafea, olu kurššat, ja sámi váhkku leat doalut mat leat oidnosindahkan min báikkálaš servvodagas. – Mii galgat ain vuoruhit dáid, lohka jođiheaddji, gii lea ilus go fas ođđasit oaččui luohtevašvuođa  jahkečoahkkimis. – Mun áiggun sáme searvvi jođihit ovddosguvlui go oainnan man deaŧalaš dat bargu maid mii doaimmahit lea, dadja Skum. – Lea somá bargat go lea stuora beroštubmi ja go stivra aktivilaččat doarju barggu!

Sii geat vállejuvvo bargat John Harald Skumain ovttas Altta sámi searvvi stivrras leat Hallgeir Strifeldt, Silje Karine Muotka, Berit Anna Gaup ja Inger Elin Utsi.

–      Altta sámi searvvis leat áin olu áššit maid stivra háliida vuojehit, dadja Skum. Earet eará háliidit ahte Altta galga guorahallat maid mearkkaša sámi giellahálddašan guovllu vuollái boahtit. – Leat olu sápmelaččat Alttas, ja Altta sámi historjá lea nanus, dadja Skum áŋgirit. Mii háliidit joatkit oassálastit sihkarastindihte buori ovdáneami gávpogis ja suohkanis, loahpaha ilolaš John Harald Skum, gii vuosttažin lohpida jahkečoahkkincealkkamušaid ovdánbuktit.