NSR bargá sámi skuvlla ovddas mas lea alla kvaliteahta. Sámi mánáide ja nuoraide galget leat ođastuvvon ja áigeguovdilis oahpponeavvut olámuttos buot fágain juohke klássas olles oahpahusvuogádagas. Mii bargat dan badjelii ahte buot sámi mánáin ja nuorain galgá leat oktagaslaš vuoigatvuohta oažžut oahpahusa sámegielas ja sámegillii. Dáhkideames buohkaide oahpahusa áigu NSR bargat dan badjelii ahte oahpahus fállojuvvo diehtojuohkin- ja gulahallanteknologiija bakte jus eai gávdno oahpaheaddjit.
Sámi ohppiin lea vuoigatvuohta oažžut oahpahusa sámi fáttáin ja sámegilli. Buot oahppit galget oahppat sámi dilálašvuođaid birra. Sámi oahppit geain leat sierranas dárbbut galget oažžut láhččojuvvon oahppofálaldaga ja sierranaspedagogalaš veahki mas sámi árvvut leat vuođđun.
Sámedikkis áigu NSR bargat dan badjelii ahte:
- sámi mánáid vuoigatvuohta oažžut oahpahusa sámegielas ja sámegillii ollášuhttojuvvo
- sámi mánát galget oažžut oktagaslaš vuoigatvuođa oažžut oahpahusa sámegillii
- gaskkustit sámi árbevieruid, giela ja árvvuid oahpahusas ja áinnas geavahit vuoras sápmelaččaid resursan
- váldit atnui neahttavuđot oahpponeavvuid
- ovdánahttit oahpahanmálliid ohppiid váste geain lea sámegiella nubbingiellan vai dat oahppit šaddet doaibmi guovttegielagat
- láhččet vejolašvuođa sámi skuvllaide ovttasbargat rájiid rastá
- dáhkidit SAÁO:i ja kultuvrralaš skuvlalávkii sámi sisdoalu.
- oččodit eambbosiid álgit sámi oahpaheaddjiohppui, earret eará stipeandaortnegiid ja lávdaduvvon oahppofálaldagaid bakte
- gávdnojit lassi- ja joatkkaoahppofálaldagat heivehuvvon sámi skuvllaid dárbbuide, nugo mat giellametodihka, gáiddusoahpahus- ja oahpponeavvopedagogihka
- máhtolašvuohta sámi dilálašvuođaid birra galgá leat oassin oahpaheaddjioahpuin buot allaskuvllain riikkas