Ovttajienálaš ekspeartajoavku ovddidii Riddoguolástuslávdegotti evttohusa. Norgga Sámiid Riikkasearvái (NSR) lei illobeaivi go evttohus bođii – go mii leat bargan mearrasámiid guolástusvuoigatvuođaid sihkarastit dan rájes go organisašuvdna álggahuvvoi 40 jagi áigi.
Viesuide čuovggat
Sáhttá dadjat ahte evttohus mii lea boahtán lea guolástusvuoigatvuođaid addit ruovttoluotta álbmogii. Buohkain, beroškeahttá etnisitehtas, galgá leat vuoigatvuohta guolástit, sihke priváhta atnui ja ealáhussan, nu ahte eai dárbbaš eriid oastit. Dát movttidiivčče olbmuid rittuin ja vuotnaguovlluin. Dustenrusttegat ja doaimmat gáttis bijašit vuođu doaimmaide fas, olmmošlohkku bisošii stáđisin ja soaitá vel lassánivčče ge, lágašbuvddat dinešišgoađášit ja fáhkkestaga livčče vel soaitá dárbu eanet giliskuvllaide fas. Ja dat buorre boahtteáiggijurdda, ahte viesuide galget čuovggat ihtit, sáhttá duohtan šaddat?
Sihkkarastit riggodagaid
Guolásteaddjit leat daid searvvis geaidda finánsaroassu lea váikkuhan garraseapmosit dan maŋimuš jagi. Sii muitalit ahte dienas lea duođas hedjonan ja ahte guolleduostut eai fuola guoli. Váikke justa dál lea váttis dilli – de lea lihkká mearrideaddji sihkarastit ahte olbmot fitnejit riggodagaid boahtteáiggi oadjebasvuođa dihte.
Imaš go sámi guolástusministtar ii daga maidege
Lea erenoamáš dehálaš ahte Riddoguolástuslávdegotti evttohus dohkkehuvvo. Lea hui imaš go guolástusministár – guhte ieš lea mearrasámi gilážis eret – ii daga maidige dáinna áššiin. Filkkasátnejođiheaddjin son hálai ollu ”guolástuspolitihkas mas lea Finnmárkkuvuohta” – muhto dađibahábut de ii leat son ministárin vel muitán dán politihka. Lea mearkkašahtti, go dá lea soaitá dat ášši mii lea ministára ”iežas” ášši mearrasápmelažžan ja Deanodaga ássin. Dát ášši stivre su gili boahtteáiggi.
Ja dál go lea válgaáigi de berrešii son sáhttit dadjat eanet go ahte ášši ferte guorahallojuvvot vel eanet. Maid oaivvilda Helga Pedersen ieš evttohusa ektui? Gulaskuddanáigi lea nohkan, nu ahte ii sáhte leat dat mii hehtte politihkkálaš digáštallama Bargiidbellodagas. Ii ge leat Helga Pedersen ballan dadjamis oaiviliid ođđa mohtorjohtolatlága ektui. Manne lea nu váttis ovddidit oaiviliid stuorradiggeevttohassan Riddoguolástuslávdegotti áššis – mii jo lea nu dehálaš midjiide geat orrut dáppe davvin?
Seammás joatkašuvvo eretfárren mearragáttiin ja vuotnaguovlluin Finnmárkkus. Dál mii vuordit ahte ii šat hállojuvvo dieváid mielde dán áššis!
Silje Karine Muotka, NSRa sámediggeevttohas
Davviguovllu válgabiire
Dárogillii/på norsk
Kommenter denne artikkelen